సీపీఎం నేతలపై నమోదైన కేసు కొట్టివేత.. ఆరేళ్ల న్యాయపోరాటానికి ముగింపు

విజయవాడ, జూలై 24 (వి10టివి): విద్యుత్ చార్జీల పెంపును వ్యతిరేకిస్తూ నిర్వహించిన ప్రజా ఉద్యమం సందర్భంగా సీపీఎం నాయకులపై నమోదైన కేసును న్యాయస్థానం కొట్టివేసిందని సీపీఎం నేతలు తెలిపారు. పశ్చిమ నగర కార్యదర్శి బోయి సత్యబాబు, నగర కమిటీ సభ్యుడు పి. రాజు, నాయకులు జి. నాగరాజు, బి. రమణ, ఎస్.డి. భాషపై క్రైమ్ నెం. 267/2000, సి.సి. నెం. 508/2023 కింద ఐపీసీ సెక్షన్లు 188, 229 ప్రకారం నమోదు చేసిన కేసులో న్యాయస్థానం వారికి అనుకూలంగా తీర్పు ఇచ్చినట్లు వెల్లడించారు. ఈ కేసులో సుమారు ఆరు సంవత్సరాల పాటు న్యాయపోరాటం కొనసాగిందని పేర్కొన్నారు. ఈ సందర్భంగా సీపీఎం నాయకులు మాట్లాడుతూ, గతంలో విద్యుత్ చార్జీల పెంపు, స్మార్ట్ మీటర్ల అమలును వ్యతిరేకిస్తూ ప్రజల తరఫున ఉద్యమాలు చేపట్టామని తెలిపారు. ప్రస్తుతం కూటమి ప్రభుత్వం కూడా విద్యుత్ భారాలను ప్రజలపై మోపుతోందని ఆరోపించారు. విద్యుత్ చార్జీలు తగ్గించామని ప్రభుత్వం చెబుతున్నదని, దీనిపై బహిరంగ చర్చకు సిద్ధమా అని ముఖ్యమంత్రి, విద్యుత్ శాఖ మంత్రిని ప్రశ్నించారు. అదేవిధంగా, రాష్ట్రంలో విద్యుత్ విధానాలు ప్రజలకు అదనపు భారం మోపుతున్నాయని, కేంద్ర–రాష్ట్ర ప్రభుత్వాలు ప్రజా ప్రయోజనాల కంటే ఇతర ప్రయోజనాలకే ప్రాధాన్యం ఇస్తున్నాయని విమర్శించారు. ఈ కేసులో న్యాయపోరాటానికి ఆల్ ఇండియా లాయర్స్ యూనియన్ అధ్యక్షుడు, బార్ కౌన్సిల్ సభ్యుడు ఎస్. రాజేంద్రప్రసాద్‌తో పాటు రాష్ట్ర నాయకులు ఎస్. రమేష్, చంద్రశేఖర్ న్యాయపరంగా సహకరించినట్లు సీపీఎం నాయకులు తెలిపారు.