బీచ్‌లో ఆత్మహత్యాయత్నం.. యువకుడికి ప్రాణం పోసిన పోలీసులు

విశాఖపట్నం, జులై 17(వి 10టివి): విశాఖ ఒకటో పట్టణ పోలీస్ స్టేషన్ పరిధిలోని బీచ్‌లో ఆత్మహత్యకు యత్నించిన ఓ యువకుడిని పోలీసులు సకాలంలో స్పందించి రక్షించారు. బీచ్ ప్రాంతంలో అనుమానాస్పదంగా ఉన్న యువకుడిని గమనించిన పోలీసులు వెంటనే అతడిని అదుపులోకి తీసుకుని ఆత్మహత్యాయత్నాన్ని అడ్డుకున్నారు.అనంతరం యువకుడిని పోలీస్ స్టేషన్‌కు తరలించి కౌన్సెలింగ్ నిర్వహించారు. విచారణలో ఆర్థిక ఇబ్బందులు, నిరుద్యోగం కారణంగా తీవ్ర మనోవేదనకు గురై ఈ నిర్ణయం తీసుకున్నట్లు అతడు వెల్లడించినట్లు పోలీసులు తెలిపారు.ఈ సందర్భంగా సీఐ వరప్రసాద్ బాధితుడికి ధైర్యం చెప్పి, జీవితంపై ఆశ కోల్పోవద్దని సూచించారు. వ్యక్తిగతంగా కొంత ఆర్థిక సహాయం కూడా అందజేసి, అనంతరం అతడిని అతని స్నేహితుడి సంరక్షణలో సురక్షితంగా పంపించారు. సమయానికి స్పందించిన పోలీసుల చర్యను స్థానికులు అభినందించారు.