జోగి రమేష్ కుటుంబంపై క్రిమినల్ కేసు.. కోడలు ఫిర్యాదుతో పోలీసుల చర్య

ఎన్టీఆర్ జిల్లా, జూలై 24 (వి10టివి): మాజీ మంత్రి జోగి రమేష్ కుటుంబ సభ్యులపై ఇబ్రహీంపట్నం పోలీస్ స్టేషన్‌లో పలు సెక్షన్ల కింద కేసు నమోదైంది. జోగి రమేష్ కుమారుడు జోగి రాజీవ్ భార్య మేఘన ఇచ్చిన ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. తన భర్త కుటుంబ సభ్యుల నుంచి నిరంతరం మానసిక, శారీరక వేధింపులు ఎదురయ్యాయని మేఘన ఫిర్యాదులో పేర్కొన్నట్లు సమాచారం. గృహహింస, వరకట్న వేధింపులు, చీటింగ్, హత్యాయత్నం వంటి తీవ్రమైన ఆరోపణలు ఆమె చేశారు. ఈ ఫిర్యాదు ఆధారంగా మాజీ మంత్రి జోగి రమేష్‌తో పాటు ఆయన కుటుంబానికి చెందిన మొత్తం 11 మందిపై పోలీసులు కేసు నమోదు చేశారు. ఫిర్యాదులోని ప్రతి ఆరోపణపై అందుబాటులో ఉన్న ఆధారాలను పరిశీలిస్తూ అన్ని కోణాల్లో విచారణ కొనసాగిస్తున్నట్లు ఇబ్రహీంపట్నం పోలీసులు తెలిపారు. అవసరమైతే సంబంధిత వ్యక్తుల వాంగ్మూలాలు నమోదు చేసి, సాక్ష్యాధారాలు సేకరించిన అనంతరం చట్టపరమైన చర్యలు తీసుకుంటామని వెల్లడించారు.