జగయ్యపేటలో ఎన్నికల వేళ ఉద్రిక్తత.. పోలీసులతో వైసీపీ నేతల వాగ్వాదం!

జగ్గయ్యపేట, నవంబర్ 1 : మున్సిపల్ ఎన్నికల పోలింగ్ సందర్భంగా జగ్గయ్యపేటలో ఉద్రిక్త పరిస్థితులు నెలకొన్నాయి. పట్టణంలోని తొర్రకుంట మండల పరిషత్ ఆదర్శ ప్రాథమిక పాఠశాల పోలింగ్ కేంద్రం వద్ద పోలీసులు, వైసీపీ కార్యకర్తల మధ్య వాగ్వాదం చోటుచేసుకుంది. పోలింగ్ బూత్‌లో తెలుగుదేశం పార్టీ ఏజెంట్లు అధిక సంఖ్యలో ఉన్నారని, అనుమతించిన సంఖ్యకు మించి వ్యక్తులను లోపలికి ఎలా అనుమతించారంటూ వైసీపీ కార్యకర్తలు పోలీసులను ప్రశ్నించారు. ఈ క్రమంలో ఇరువర్గాల మధ్య మాటామాటా పెరిగి పరిస్థితి ఉద్రిక్తంగా మారినట్లు సమాచారం. వాగ్వాదం సందర్భంగా విధుల్లో ఉన్న ఎస్సై చొక్కాను పట్టుకుని లాగినట్లు ఆరోపణలు వెలువడ్డాయి. అక్కడున్న పోలీసులు జోక్యం చేసుకుని పరిస్థితిని అదుపులోకి తీసుకొచ్చేందుకు ప్రయత్నించారు. పోలింగ్ కేంద్రాల్లో ఎన్నికల ఏజెంట్లకు సంబంధించిన నిబంధనలను కచ్చితంగా అమలు చేయాలని వైసీపీ కార్యకర్తలు డిమాండ్ చేశారు. ఘటనకు సంబంధించిన వీడియో సామాజిక మాధ్యమాల్లో ప్రచారంలోకి వచ్చింది. అయితే ఎస్సైపై దాడి జరిగిందా, ఏజెంట్ల సంఖ్య నిబంధనలకు విరుద్ధంగా ఉందా అనే అంశాలపై అధికారిక నిర్ధారణ రావాల్సి ఉంది. ఎన్నికల పోలింగ్ జరుగుతున్న సమయంలో చోటుచేసుకున్న ఈ ఘటన స్థానికంగా చర్చనీయాంశమైంది.