డిజిటల్ అరెస్ట్‌.. రూ.2 కోట్లకు ఎసరు!

గుంటూరు, నవంబర్ 14 : సైబర్ నేరగాళ్లు మరో భారీ మోసానికి తెగబడ్డారు. పోలీసులమంటూ ఫోన్ చేసి, కేసుల పేరుతో బెదిరించి వృద్ధ దంపతుల నుంచి ఏకంగా రూ.2.01 కోట్లు కాజేశారు. గుంటూరు జిల్లా తాడేపల్లిలో వెలుగుచూసిన ఈ ఘటన కలకలం రేపింది. బాధితుల వివరాల ప్రకారం.. బెంగళూరు పోలీసులమంటూ వృద్ధ దంపతులకు సైబర్ నేరగాళ్లు ఫోన్ చేశారు. నళినీదేవిపై బెంగళూరులో 17 కేసులు నమోదయ్యాయని, విచారణ ఎదుర్కోవాల్సి ఉంటుందని బెదిరించారు. 'డిజిటల్ అరెస్ట్' పేరుతో తీవ్ర భయాందోళనకు గురిచేశారు. వారి మాటలను నమ్మిన బాధితులు మ్యూచువల్ ఫండ్స్‌లో దాచుకున్న నగదును నేరగాళ్లు సూచించిన ఖాతాలకు బదిలీ చేశారు. ఇలా మొత్తం రూ.2.01 కోట్లు కోల్పోయినట్లు ఫిర్యాదులో పేర్కొన్నారు. జీవితకాల పొదుపు సైబర్ మాయలో! ఎన్నో ఏళ్లుగా దాచుకున్న సొమ్మును ఒక్క మోసపూరిత వ్యవహారంతో కోల్పోవడంతో వృద్ధ దంపతులు తీవ్ర ఆందోళనకు గురయ్యారు. మోసపోయినట్లు గుర్తించిన అనంతరం తాడేపల్లి పోలీసులను ఆశ్రయించారు. బాధితుల ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు.