జోరువానలోనూ జోరుగా కూటమి ప్రచారం!

నందివాడ, నవంబర్ 3: స్థానిక సంస్థల ఎన్నికల్లో ప్రజలందరూ ఆత్మసాక్షిగా ఓటు హక్కును వినియోగించుకోవాలని గుడివాడ ఎమ్మెల్యే వెనిగండ్ల రాము పిలుపునిచ్చారు. నవంబర్ 5న జరగనున్న ఎన్నికల నేపథ్యంలో మంగళవారం నందివాడ మండలంలో కూటమి ప్రచారాన్ని నిర్వహించారు. జోరుగా కురుస్తున్న వర్షాన్ని సైతం లెక్కచేయకుండా ఏపీ ఎస్‌డబ్ల్యూసీ చైర్మన్ రావి వెంకటేశ్వరరావు, కూటమి నాయకులతో కలిసి ఎమ్మెల్యే బైక్ ర్యాలీల్లో పాల్గొన్నారు. రుద్రపాక, గోపాలపురం, గొంగళ్లమూడి, పోలుకొండ, నందివాడ గ్రామాల్లో జడ్పీటీసీ అభ్యర్థి దుడ్ల రాజ ప్రదీప్ కుమార్, ఎంపీటీసీ అభ్యర్థులకు మద్దతుగా ప్రచారం చేశారు. కొన్ని గ్రామాల్లో వర్షం కారణంగా బహిరంగ ప్రచారానికి బదులుగా పార్టీ శ్రేణులతో సమావేశాలు నిర్వహించారు. అభివృద్ధికే ప్రజల ప్రాధాన్యం ఈ సందర్భంగా ఎమ్మెల్యే రాము మాట్లాడుతూ ప్రజలు ప్రస్తుతం అభివృద్ధి, సంక్షేమం, జవాబుదారీతనాన్ని కోరుకుంటున్నారని అన్నారు. కూటమి ప్రభుత్వం చేపట్టిన అభివృద్ధి కార్యక్రమాలు, సంక్షేమ పథకాలకు స్థానిక ఎన్నికల్లో ప్రజల మద్దతు లభిస్తుందని ధీమా వ్యక్తం చేశారు. గుడివాడ నియోజకవర్గంలో పలు ప్రాంతాల్లో వైసీపీ అభ్యర్థులు డిపాజిట్లు కోల్పోయే పరిస్థితి ఉందని వ్యాఖ్యానించారు. మున్సిపల్ ఎన్నికల ఫలితాలకు మించి కూటమికి ప్రజాదరణ లభిస్తుందని ఆశాభావం వ్యక్తం చేశారు. ఎన్నికల తర్వాత కక్షలు వద్దు ఎన్నికలు ముగిసిన తర్వాత గ్రామాల్లో రాజకీయ విభేదాలు కొనసాగకూడదని ఎమ్మెల్యే సూచించారు. పార్టీలకు అతీతంగా అందరూ గ్రామాభివృద్ధిలో భాగస్వాములు కావాలని కోరారు. గత వరదల సమయంలో రాజకీయాలకు అతీతంగా బాధితులకు సహాయం అందించామని కూటమి నాయకులు పేర్కొన్నారు. వైసీపీ నాయకులు అసత్య ప్రచారం చేస్తున్నారని ఆరోపించారు. ప్రచారంలో మాజీ మంత్రి పిన్నమనేని వెంకటేశ్వరరావు, టీడీపీ సీనియర్ నాయకుడు పిన్నమనేని బాబ్జి, జడ్పీటీసీ అభ్యర్థి దుడ్ల ప్రదీప్, ఎంపీటీసీ అభ్యర్థులు మానేపల్లి సలోమి, జగన్, శ్రావణి, దారం రాణి, మండల టీడీపీ అధ్యక్షుడు దానేటి సన్యాసిరావు, మార్కెట్ యార్డ్ చైర్మన్ చాట్రగడ్డ రవికుమార్ తదితరులు పాల్గొన్నారు. సాయంత్రం ఐదు గంటలకు ప్రచారాన్ని ముగించారు.