అమ్మకానికి కాదు.. ‘గబ్బర్ సింగ్‌’కు గిఫ్ట్!

తూర్పుగోదావరి జిల్లా, కడియం మండలం, పొట్టిలంక, సెప్టెంబరు 9: మట్టిలో మొలిచిన మొక్కకు కళాత్మక రూపమిస్తే... అదే గణనాథుడిగా దర్శనమిస్తే ఎలా ఉంటుంది? కడియం మండలం పొట్టిలంకలోని మురుగన్ నర్సరీలో యువ రైతు దూలం ధనరాజు రెండేళ్ల శ్రమతో తీర్చిదిద్దిన ‘వృక్ష గణపతి’ ఇప్పుడు చూపరులను విశేషంగా ఆకట్టుకుంటోంది.

గణపతి నవరాత్రులు సమీపిస్తున్న వేళ వినూత్న గణనాథుల ప్రతిమలు ప్రత్యేక ఆకర్షణగా నిలుస్తున్నాయి. ఈ నేపథ్యంలో ధనరాజు ఏకంగా సజీవ మొక్కలతో గణపతి ఆకృతిని తీర్చిదిద్దారు. సుమారు తొమ్మిది అడుగుల ఎత్తు, నాలుగు అడుగుల వెడల్పుతో రూపొందిన ఈ వృక్ష గణపతి ప్రత్యేక ఆకర్షణగా మారింది.

ముందుగా ఇనుప తీగలతో గణపతి ఆకారాన్ని రూపొందించి, నాలుగు మాల్పీజియా తీగజాతి మొక్కలను దానికి అమర్చారు. మొక్కలు పెరిగే కొద్దీ వాటిని గణపతి ఆకృతిలో అల్లుకుంటూ, అవసరమైన చోట కత్తిరిస్తూ రెండేళ్లపాటు ప్రత్యేక శ్రద్ధ తీసుకున్నారు. చివరకు పచ్చని మొక్కల మధ్య గణనాథుడి రూపం స్పష్టంగా కనిపించేలా తీర్చిదిద్దారు.

పదో తరగతి వరకు చదివిన ధనరాజుకు చిన్ననాటి నుంచే బొమ్మల తయారీపై ఆసక్తి. అదే ఆసక్తితో నర్సరీ రంగంలోకి అడుగుపెట్టి మొక్కలతో విభిన్న ఆకృతులను రూపొందిస్తున్నారు. చెస్ హార్స్, గిటార్, గార్డెన్ లైట్, వివిధ పుష్పాకృతుల్లో ఆయన తీర్చిదిద్దుతున్న మొక్కలకు ఇతర రాష్ట్రాల నుంచి కూడా ఆదరణ లభిస్తోందని తెలిపారు.

‘పవన్‌కు కానుకగా ఇస్తా’

ఈ వృక్ష గణపతికి ఎంత ధర ఇచ్చినా అమ్మేది లేదని ధనరాజు స్పష్టం చేశారు. తన అభిమాన నేత, ఉప ముఖ్యమంత్రి పవన్ కళ్యాణ్ అవకాశం కల్పిస్తే ఆయన పార్టీ కార్యాలయం లేదా ఫామ్‌హౌస్‌లో ఏర్పాటు చేసుకునేందుకు కానుకగా అందిస్తానని తెలిపారు. రెండేళ్ల తన శ్రమకు పవన్ కళ్యాణ్ నుంచి ప్రశంస లభిస్తే అదే తనకు గొప్ప గుర్తింపని ధనరాజు పేర్కొన్నారు