స్థానిక సమరానికి చంద్రబాబు గెలుపు మంత్రం!

ఎంపీటీసీ, జడ్పీటీసీ ఎన్నికల్లో కూటమి అభ్యర్థుల విజయమే లక్ష్యంగా సమన్వయంతో పనిచేయాలని ముఖ్యమంత్రి నారా చంద్రబాబు నాయుడు తెలుగుదేశం పార్టీ నాయకులకు దిశానిర్దేశం చేశారు. ఎన్నికల నేపథ్యంలో పార్టీ నేతలతో నిర్వహించిన సమావేశంలో ప్రచార వ్యూహాలు, అభ్యర్థుల ఎంపిక, క్షేత్రస్థాయి పరిస్థితులపై పలు సూచనలు చేశారు. ‘చెప్పాం.. చేస్తున్నాం’ అనే నినాదంతో ప్రజల్లోకి వెళ్లాలని, ప్రభుత్వం అమలు చేస్తున్న సంక్షేమ పథకాలు, అభివృద్ధి కార్యక్రమాలను వివరించాలని సూచించారు. కూటమి పార్టీల మధ్య సమన్వయం అత్యంత ముఖ్యమని, వ్యక్తిగత విభేదాలకు తావులేకుండా కలిసి పనిచేయాలని స్పష్టం చేశారు. ఎన్నికల్లో టికెట్లు దక్కని నాయకులు నిరుత్సాహానికి గురికావద్దని, అర్హులైన వారికి భవిష్యత్తులో నామినేటెడ్ పదవుల్లో అవకాశాలు కల్పిస్తామని హామీ ఇచ్చారు. రెబల్ అభ్యర్థులు నామినేషన్లను ఉపసంహరించుకునేలా పార్టీ నాయకులు చొరవ చూపాలని ఆదేశించారు. క్షేత్రస్థాయిలో కూటమి అభ్యర్థుల గెలుపునకు అనుకూల వాతావరణం కల్పించాలని, ప్రతి నాయకుడు బాధ్యతగా పనిచేయాలని చంద్రబాబు సూచించారు. ఎన్నికల్లో సీట్ల సర్దుబాట్లు సాఫీగా జరిగేలా చూడాలని పార్టీ శ్రేణులకు దిశానిర్దేశం చేశారు.