తరగతి గదిలో విద్యార్థినిపై దాడి.. ప్రభుత్వంపై జగన్ ఆగ్రహం!

అమరావతి, అక్టోబర్ 31: అనంతపురం జిల్లాలోని ప్రభుత్వ పాఠశాలలో తరగతి గదిలోనే విద్యార్థినిపై దుండగుడు దాడికి పాల్పడిన ఘటనపై వైసీపీ అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డి తీవ్ర ఆందోళన వ్యక్తం చేశారు. కూటమి ప్రభుత్వ హయాంలో శాంతిభద్రతలు కుప్పకూలిపోయాయని విమర్శించారు. విద్యార్థులు చదువుకునే ప్రభుత్వ పాఠశాలలోకి ఓ దుండగుడు స్వేచ్ఛగా ప్రవేశించి విద్యార్థినిపై దాడి చేయడం ఎలా సాధ్యమైందని ప్రశ్నించారు. దాడిని అడ్డుకునేందుకు ప్రయత్నించిన మరో విద్యార్థిని కూడా గాయపడటం అత్యంత బాధాకరమని జగన్ పేర్కొన్నారు. విద్యార్థుల భద్రతకు ప్రభుత్వం ఎలాంటి చర్యలు తీసుకుంటోందని ప్రశ్నించారు. పాలనను పక్కనపెట్టి రాజకీయ కక్ష సాధింపులకు ప్రభుత్వం ప్రాధాన్యం ఇస్తోందని ఆరోపించారు. దాడిలో గాయపడిన విద్యార్థినులకు అత్యుత్తమ వైద్య సేవలు అందించాలని, వారి ఆరోగ్య పరిస్థితిని నిరంతరం పర్యవేక్షించాలని ప్రభుత్వాన్ని కోరారు. బాధిత కుటుంబాలకు అన్ని విధాలా భరోసా కల్పించాలని డిమాండ్ చేశారు. ఘటనపై పారదర్శకంగా దర్యాప్తు నిర్వహించి, నిందితుడిపై చట్టప్రకారం కఠిన చర్యలు తీసుకోవాలని వైఎస్ జగన్‌మోహన్‌రెడ్డి కోరారు.