74వ డివిజన్‌లో టీడీపీ అభ్యర్థి గోపి సాయికుమార్ ప్రచారం

పాయకాపురం, అక్టోబర్ 29: విజయవాడ సెంట్రల్ నియోజకవర్గంలోని 74వ డివిజన్‌లో ఇళ్ల పట్టాల రిజిస్ట్రేషన్‌కు కృషి చేస్తామని టీడీపీ కార్పొరేటర్ అభ్యర్థి గోపి సాయికుమార్ హామీ ఇచ్చారు. గురువారం ఎన్డీఏ కూటమి నాయకులు, కార్యకర్తలతో కలిసి డివిజన్‌లో ఎన్నికల ప్రచారం నిర్వహించారు. ఇంటింటికీ వెళ్లి స్థానిక ప్రజలను కలుసుకుని వారి సమస్యలను అడిగి తెలుసుకున్నారు. ఈ సందర్భంగా గోపి సాయికుమార్ మాట్లాడుతూ కూటమి ప్రభుత్వం సంక్షేమం, అభివృద్ధికి ప్రాధాన్యత ఇస్తోందన్నారు. పింఛన్ల పెంపు, మహిళలకు ఉచిత బస్సు ప్రయాణం, తల్లికి వందనం, అన్న క్యాంటీన్ల ద్వారా రూ.5కే భోజనం, ఏడాదికి మూడు ఉచిత గ్యాస్ సిలిండర్ల పంపిణీ వంటి పథకాలను అమలు చేస్తున్నట్లు వివరించారు. విజయవాడ సెంట్రల్ నియోజకవర్గంలో గత 27 నెలల్లో సుమారు రూ.700 కోట్లతో అభివృద్ధి పనులు చేపట్టినట్లు తెలిపారు. సింగ్‌నగర్‌లోని మాకినేని బసవపున్నయ్య స్టేడియంలో ముఖ్యమంత్రి చంద్రబాబు చేతుల మీదుగా వేలాది మందికి ఇళ్ల పట్టాలు అందించారని గుర్తుచేశారు. అర్హులైన లబ్ధిదారులకు ఇళ్ల పట్టాల రిజిస్ట్రేషన్ ప్రక్రియ పూర్తయ్యేలా కృషి చేస్తామని పేర్కొన్నారు. ఎన్నికల్లో సైకిల్ గుర్తుపై తనకు, గాజు గ్లాసు గుర్తుపై మేయర్ అభ్యర్థి వంగవీటి రాధాకృష్ణకు ఓటు వేసి గెలిపించాలని కోరారు. ఈ ప్రచారంలో టీడీపీ నాయకులు ఎరుబోతు శ్రావణి రామారావు, గుండపు చలపతిరావు, అమర్‌నాథ్, రవికుమార్ తదితరులు పాల్గొన్నారు.