విజయవాడ అభివృద్ధికి కూటమి ప్రభుత్వం కట్టుబడి ఉంది: గద్దె రామమోహన్

విజయవాడ, అక్టోబర్ 29 : విజయవాడ నగర అభివృద్ధిలో తెలుగుదేశం పార్టీ కీలక పాత్ర పోషించిందని తూర్పు నియోజకవర్గ ఎమ్మెల్యే గద్దె రామమోహన్ పేర్కొన్నారు. నగరంలోని వాటర్ ట్యాంకులు, బస్‌స్టాండ్, ఫ్లైఓవర్లు, ప్రధాన రహదారులు టీడీపీ ప్రభుత్వ హయాంలోనే నిర్మించామని తెలిపారు. నగరాన్ని మరింత అభివృద్ధి చేసేందుకు కూటమి ప్రభుత్వం కట్టుబడి ఉందన్నారు. విజయవాడ తూర్పు నియోజకవర్గ పరిధిలోని 4వ డివిజన్ విజయ్‌నగర్ కాలనీలో బుధవారం కురిసిన భారీ వర్షానికి కూలిపోయిన బంట్రపల్లి వెంకటేశ్వరరావు ఇంటిని ఎమ్మెల్యే గద్దె రామమోహన్ గురువారం పరిశీలించారు. బాధిత కుటుంబ సభ్యులతో మాట్లాడి జరిగిన నష్టాన్ని అడిగి తెలుసుకున్నారు. ఈ సందర్భంగా ఆయన మాట్లాడుతూ అర్నబ్ తుఫాను హెచ్చరికల నేపథ్యంలో కొండ ప్రాంతాల్లో నివసించే ప్రజలను ముందుగానే అప్రమత్తం చేసినట్లు తెలిపారు. తుఫాను ప్రభావం కృష్ణా జిల్లాపై తక్కువగానే ఉన్నప్పటికీ కొండ ప్రాంతంలో ఉన్న ఓ ఇల్లు దెబ్బతినడం బాధాకరమన్నారు. బాధిత కుటుంబానికి ప్రభుత్వం నుంచి నష్టపరిహారం అందేలా చర్యలు తీసుకుంటామని హామీ ఇచ్చారు.