కొత్త జెండాతో విజయసాయి రాజకీయ సమరం!

విజయవాడ, నవంబర్ 11 : ఆంధ్రప్రదేశ్ రాజకీయాల్లో మరో కొత్త పార్టీ ఆవిర్భవించింది. మాజీ రాజ్యసభ సభ్యుడు వి. విజయసాయిరెడ్డి బుధవారం విజయవాడ వేదికగా తన నూతన రాజకీయ ప్రస్థానానికి శ్రీకారం చుట్టారు. నగరంలోని ఏ కన్వెన్షన్ సెంటర్‌లో ఏర్పాటు చేసిన కార్యక్రమంలో కొత్త రాజకీయ పార్టీని ప్రకటించారు. విడుదలైన వార్తా కథనం ప్రకారం పార్టీకి ‘పరివర్తన రాజకీయ పార్టీ’ (పీఆర్‌పీ)గా నామకరణం చేశారు. కొత్త పార్టీ జెండాలో తెలుపు, కాషాయ రంగులను ఉపయోగించగా, మధ్యలో ధర్మచక్రాన్ని పొందుపరిచినట్లు కథనంలో పేర్కొన్నారు. దేశం కోసం, ధర్మం కోసం తమ పార్టీ పనిచేస్తుందని విజయసాయిరెడ్డి స్పష్టం చేసినట్లు వెల్లడించారు. యువత రాజకీయాల్లోకి రావాలనే లక్ష్యంతో కొత్త పార్టీని ఏర్పాటు చేశామని, ప్రతి ఒక్కరికీ సమాన హక్కులు, అవకాశాలు కల్పించేందుకు కృషి చేస్తామని తెలిపారు. రాష్ట్రంలో అధికార, ప్రతిపక్ష పార్టీలకు ప్రత్యామ్నాయ రాజకీయ వేదిక అవసరమని విజయసాయిరెడ్డి గతంలోనే పేర్కొన్నారు. ప్రజా సంక్షేమం, రాష్ట్రాభివృద్ధి, యువతకు ఉపాధి అవకాశాలు, ఆంధ్రప్రదేశ్ హక్కుల పరిరక్షణ తమ ప్రధాన లక్ష్యాలని వెల్లడించారు. వైఎస్సార్‌సీపీలో కీలక నేతగా వ్యవహరించిన విజయసాయిరెడ్డి సొంత పార్టీతో రాజకీయ రంగంలోకి రావడం ప్రాధాన్యం సంతరించుకుంది. కొత్త పార్టీ రాష్ట్ర రాజకీయ సమీకరణాలపై ఎలాంటి ప్రభావం చూపుతుందన్నది ఆసక్తికరంగా మారింది.