అర్ధరాత్రి ఇంటిపై దాడి.. జనసేన నేతలపై దేవినేని అవినాష్ ఆగ్రహం!

విజయవాడ, నవంబర్ 2: మున్సిపల్ ఎన్నికల పోలింగ్ ముగిసిన తర్వాత విజయవాడలో రాజకీయ దాడులకు పాల్పడుతున్నారంటూ వైఎస్సార్ కాంగ్రెస్ పార్టీ ఎన్టీఆర్ జిల్లా అధ్యక్షుడు దేవినేని అవినాష్ తీవ్ర ఆరోపణలు చేశారు. వైసీపీ కోసం పనిచేసిన వారిని లక్ష్యంగా చేసుకుని దాడులు చేస్తున్నారని, మాజీ కార్పొరేటర్ పళ్లెం రవికుమార్ ఇంటి వద్ద ఆదివారం అర్ధరాత్రి జనసేన నాయకులు బెదిరింపులకు పాల్పడ్డారని ఆరోపించారు. రవికుమార్ ఇంట్లో లేని సమయంలో ఆయన భార్య, పిల్లలను భయభ్రాంతులకు గురిచేయడం అత్యంత దారుణమని మండిపడ్డారు. డివిజన్‌లో ప్రజాదరణ కలిగిన రవికుమార్‌ను రాజకీయంగా ఎదుర్కోలేక ఆయన కుటుంబాన్ని లక్ష్యంగా చేసుకున్నారని అవినాష్ విమర్శించారు. సుమారు పది మంది ఇంటి వద్దకు వచ్చి దుర్భాషలాడారని, తలుపులు మూసుకోవడంతో వాటిని బద్దలు కొట్టేందుకు ప్రయత్నించారని ఆరోపించారు. మహిళలు, చిన్నపిల్లలను బెదిరించడం ఏ విధమైన రాజకీయ సంస్కృతి అని ప్రశ్నించారు. పవన్ కల్యాణ్ ఏం సమాధానం చెబుతారు? జనసేన నాయకులపై వచ్చిన ఈ ఆరోపణలకు ఆ పార్టీ అధినేత పవన్ కల్యాణ్ ఏం సమాధానం చెబుతారని అవినాష్ ప్రశ్నించారు. మహిళలను బెదిరించిన వారిపై కేసులు నమోదు చేసి కఠిన చర్యలు తీసుకోవాలని డిమాండ్ చేశారు. రాష్ట్రంలో జంగిల్ రాజ్ పాలన కొనసాగుతోందని విమర్శించారు. ఈ ఘటనపై నగర పోలీస్ కమిషనర్‌కు ఫిర్యాదు చేస్తామని, పోలీసులు స్పందించకపోతే న్యాయస్థానాన్ని ఆశ్రయిస్తామని స్పష్టం చేశారు. బాధ్యులకు శిక్ష పడే వరకు పోరాటం కొనసాగిస్తామని, వైసీపీ కార్యకర్తలకు పార్టీ అండగా ఉంటుందని భరోసా ఇచ్చారు. నా భర్త లేని సమయంలో వచ్చి బెదిరించారు: తేజేశ్వరి తన భర్త ఇంట్లో లేని సమయంలో జనసేన నేత జయ, ఆయన అనుచరులు ఇంటి వద్దకు వచ్చి తనను, పిల్లలను బెదిరించారని రవికుమార్ భార్య తేజేశ్వరి ఆరోపించారు. వారి ప్రవర్తనతో కుటుంబ సభ్యులు తీవ్ర భయాందోళనకు గురయ్యారని తెలిపారు. కులం పేరుతో నన్ను లక్ష్యంగా చేసుకున్నారు: రవికుమార్ ఎన్నికల్లో గెలుపోటములను ప్రజలే నిర్ణయిస్తారని మాజీ కార్పొరేటర్ పళ్లెం రవికుమార్ అన్నారు. జిలానీ అనే వ్యక్తి తనకు ఫోన్ చేసి దుర్భాషలాడారని ఆరోపించారు. తాను బీసీ సామాజికవర్గానికి చెందిన వ్యక్తిని కావడంతో లక్ష్యంగా చేసుకున్నారని పేర్కొన్నారు. తన భార్యాపిల్లలను భయపెట్టిన వారందరిపై పోలీసులకు ఫిర్యాదు చేస్తామని తెలిపారు.