ఎంపీటీసీ, జెడ్పీటీసీ ఎన్నికలకు ఏర్పాట్లు వేగవంతం!

కడప, నవంబర్ 2: వైఎస్సార్ కడప జిల్లాలో త్వరలో జరగనున్న ఎంపీటీసీ, జెడ్పీటీసీ సాధారణ ఎన్నికల నిర్వహణకు జిల్లా యంత్రాంగం సన్నాహాలను వేగవంతం చేసింది. ఎన్నికల ప్రక్రియను సజావుగా నిర్వహించేందుకు ఐదు రెవెన్యూ డివిజన్ల పరిధిలో ఎన్నికల సామగ్రి పంపిణీ కేంద్రాలు, స్ట్రాంగ్ రూమ్‌లు, ఓట్ల లెక్కింపు కేంద్రాలను ఖరారు చేసినట్లు జిల్లా కలెక్టర్, జిల్లా ఎన్నికల అధికారి డాక్టర్ శ్రీధర్ చెరుకూరి వెల్లడించారు. ఈ మేరకు ఉత్తర్వులు జారీ చేసినట్లు తెలిపారు. ఐదు డివిజన్లలో కేంద్రాల కేటాయింపు బద్వేల్ రెవెన్యూ డివిజన్ పరిధిలోని బి.కోడూరు, మైదుకూరు, సాకన్, బి.మట్టం, గోపవరం, కలసపాడు, పోరుమామిళ్ల మండలాలకు బద్వేల్‌లోని అంబేద్కర్ గురుకులాన్ని కేంద్రంగా నిర్ణయించారు. జమ్మలమడుగు డివిజన్ పరిధిలోని మైలవరం, దువ్వూరు, పెద్దముడియం, ప్రొద్దుటూరు మండలాలకు జమ్మలమడుగులోని పాలిటెక్నిక్ కళాశాలను కేటాయించారు. కడప రెవెన్యూ డివిజన్ పరిధిలోని సిద్ధవటం, ఒంటిమిట్ట మండలాలకు కడపలోని మౌలానా ఆజాద్ ఉర్దూ విశ్వవిద్యాలయాన్ని కేంద్రంగా ఖరారు చేశారు. పులివెందుల డివిజన్ పరిధిలోని లింగాల, పులివెందుల, వేముల, వేంపల్లె మండలాలకు పులివెందులలోని జెడ్పీహెచ్‌ఎస్, రామనప్ప సత్రం, అన్నకాలమగుడు పాఠశాలను కేంద్రంగా నిర్ణయించారు. రాజంపేట డివిజన్ పరిధిలోని నందలూరు, రాజంపేట, టి.సుండుపల్లి, వీరబల్లి మండలాలకు రాజంపేట ప్రభుత్వ డిగ్రీ కళాశాలను కేటాయించారు. భద్రతా ఏర్పాట్లపై ప్రత్యేక దృష్టి ఎన్నికల సామగ్రి పంపిణీ నుంచి ఓట్ల లెక్కింపు వరకు ప్రతి దశలో పకడ్బందీ ఏర్పాట్లు ఉండాలని కలెక్టర్ ఆదేశించారు. స్ట్రాంగ్ రూమ్‌ల భద్రత,కౌంటింగ్ కేంద్రాల్లో బారికేడ్లు, ఇతర మౌలిక వసతుల కల్పనపై ప్రత్యేక దృష్టి సారించాలని సూచించారు. పంచాయతీరాజ్ శాఖ ఇంజనీరింగ్ అధికారులు నిబంధనల ప్రకారం ఏర్పాట్లను పర్యవేక్షించాలని స్పష్టం చేశారు. రెవెన్యూ డివిజనల్ అధికారులు, రిటర్నింగ్ అధికారులు, సహాయ రిటర్నింగ్ అధికారులు తమకు కేటాయించిన బాధ్యతలను సమర్థంగా నిర్వర్తించాలని కలెక్టర్ శ్రీధర్ చెరుకూరి ఆదేశించారు. ఎన్నికల నిర్వహణలో ఎలాంటి ఇబ్బందులు తలెత్తకుండా అన్ని శాఖలు సమన్వయంతో పనిచేసి ముందస్తు ఏర్పాట్లను పూర్తి చేయాలని సూచించారు.