భవానీలతో కిటకిటలాడుతున్న ఇంద్రకీలాద్రి పరిసరాలు

విజయవాడ, అక్టోబర్ 22: ఇంద్రకీలాద్రి పరిసరాలు భవానీ భక్తులతో కిక్కిరిసిపోయాయి. శ్రీ కనకదుర్గమ్మ దర్శనానికి గురువారం వివిధ ప్రాంతాల నుంచి భవానీ దీక్షాధారులు భారీ సంఖ్యలో తరలివచ్చారు. జై భవానీ, జైజై భవానీ నామస్మరణతో ఆలయ పరిసరాలు మార్మోగుతున్నాయి. వినాయకుని ఆలయం, శనేశ్వరస్వామి ఆలయ ప్రాంగణం, భవానిపురం, కుమ్మరిపాలెం, ఆర్టీసీ వర్క్‌షాప్ రోడ్డు ప్రాంతాలన్నీ భవానీ భక్తులతో సందడిగా మారాయి. కేశఖండనశాల వద్ద భారీ రద్దీ భవానీ దీక్ష విరమణలో భాగంగా తలనీలాలు సమర్పించేందుకు పెద్ద సంఖ్యలో భక్తులు తరలివస్తున్నారు. ముఖ్యంగా శనేశ్వరస్వామి ఆలయం ముందు ప్రాంగణం, కేశఖండనశాల వద్ద భక్తుల రద్దీ అధికంగా కనిపిస్తోంది. దీంతో ఆయా ప్రాంతాల్లో కట్టుదిట్టమైన ఏర్పాట్లు చేపట్టారు. భక్తులు ఒకరినొకరు నెట్టుకోకుండా క్రమపద్ధతిలో ముందుకు సాగాలని అధికారులు సూచిస్తున్నారు. భవానీ భక్తుల రాకతో భవానిపురం, ఆర్టీసీ వర్క్‌షాప్ రోడ్డు, విద్యాధరపురం, కుమ్మరిపాలెం సెంటర్ ప్రాంతాల్లో వాహనాల రద్దీ పెరిగింది. ట్రాఫిక్‌కు అంతరాయం కలగకుండా పోలీసులు ఆయా ప్రాంతాల్లో వాహనాల రాకపోకలను క్రమబద్ధీకరిస్తున్నారు. భక్తుల భద్రతకు ప్రాధాన్యమిస్తూ రద్దీ ప్రాంతాలపై ప్రత్యేక దృష్టి సారించారు. పోలీసులకు సహకరించాలని విజ్ఞప్తి అమ్మవారి దర్శనానికి, తలనీలాల సమర్పణకు వచ్చే భక్తులు సంయమనం పాటించాలని, తోపులాటలకు పాల్పడకుండా క్యూలైన్లలో క్రమశిక్షణతో ముందుకు సాగాలని సూచిస్తున్నారు. ముఖ్యంగా కేశఖండనశాల వద్ద చిన్నారులు, మహిళలు, వృద్ధులకు ఇబ్బందులు కలగకుండా జాగ్రత్తలు తీసుకోవాలని కోరుతున్నారు. ట్రాఫిక్ నియంత్రణ, భద్రతా ఏర్పాట్ల విషయంలో భవానీ భక్తులంతా పోలీసులకు సహకరించాలని విజ్ఞప్తి చేస్తున్నారు.