బాధిత విద్యార్థిని కోసం బెంగళూరుకు జగన్!

అనంతపురం, నవంబర్ 2 : అనంతపురం జిల్లా రాప్తాడు మండలంలో జరిగిన దారుణ దాడిలో తీవ్రంగా గాయపడిన విద్యార్థినిని వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్‌మోహన్‌రెడ్డి సోమవారం పరామర్శించనున్నారు. బెంగళూరులోని మణిపాల్ ఆస్పత్రిలో చికిత్స పొందుతున్న బాలికను మధ్యాహ్నం 2.15 గంటలకు ఆయన కలవనున్నట్లు సమాచారం. రాప్తాడు మండలంలోని జిల్లా పరిషత్ ఉన్నత పాఠశాలలోకి ప్రవేశించిన ఓ వ్యక్తి రంపం యంత్రంతో విద్యార్థినిపై దాడికి పాల్పడిన ఘటన తీవ్ర కలకలం రేపింది. ఈ దాడిలో గాయపడిన బాలికకు ప్రస్తుతం బెంగళూరులో వైద్య చికిత్స అందిస్తున్నారు. ఈ నేపథ్యంలో ఆస్పత్రికి వెళ్లనున్న జగన్ బాలిక ఆరోగ్య పరిస్థితిని వైద్యులను అడిగి తెలుసుకోనున్నారు. ఆమెకు అందిస్తున్న చికిత్స, కోలుకునే అవకాశాలు, అవసరమైన వైద్య సేవలపై ఆరా తీయనున్నారు. అనంతరం బాధిత కుటుంబ సభ్యులను కలిసి ధైర్యం చెప్పనున్నట్లు సమాచారం. పాఠశాల ప్రాంగణంలోనే విద్యార్థినిపై దాడి జరగడం విద్యార్థుల భద్రతపై ఆందోళనలకు దారితీసింది. ఈ ఘటనపై సమగ్ర దర్యాప్తు జరిపి బాధ్యులపై కఠిన చర్యలు తీసుకోవాలనే డిమాండ్లు వ్యక్తమవుతున్నాయి.