ఓటమిలోనూ అండగా.. అభ్యర్థులకు చింతమనేని భరోసా!

పెదవేగి, నవంబర్ 8: ఎన్నికల్లో గెలిచిన వారితో సంబరాలు చేసుకోవడమే కాదు.. ఓటమి పాలైన అభ్యర్థులకు సైతం అండగా నిలవాలని దెందులూరు ఎమ్మెల్యే చింతమనేని ప్రభాకర్ పేర్కొన్నారు. స్థానిక సంస్థల ఎన్నికల్లో స్వల్ప ఓట్ల తేడాతో పరాజయం పాలైన ఇద్దరు కూటమి అభ్యర్థులను ఆయన స్వయంగా వారి ఇళ్లకు వెళ్లి పరామర్శించారు. శనివారం వెలువడిన ఎంపీటీసీ ఎన్నికల ఫలితాల అనంతరం పెదవేగి మండలంలో ఎమ్మెల్యే చింతమనేని ప్రభాకర్ పర్యటించారు. లక్ష్మీపురం ఎంపీటీసీ స్థానం నుంచి పోటీ చేసి ఓటమి చెందిన మేకా నాగమణి, కూచింపూడి ఎంపీటీసీ స్థానం నుంచి పోటీ చేసిన గిత్తా దేవికారాణి వీరాస్వామి కుటుంబాలను కలిసి ధైర్యం చెప్పారు. ఎన్నికల్లో గెలుపోటములు సహజమని, ఓటమిని చూసి నిరుత్సాహపడాల్సిన అవసరం లేదని అభ్యర్థులకు సూచించారు. ప్రజల కోసం చేసిన కృషి వృథా కాదని, ఎన్నికల ఫలితాలతో సంబంధం లేకుండా ప్రజాసేవలో కొనసాగాలని కోరారు.భవిష్యత్తులో వారికి సముచిత ప్రాధాన్యం కల్పించడంతో పాటు అన్ని విధాలా అండగా ఉంటానని భరోసా ఇచ్చారు. నియోజకవర్గంలో కూటమి విజయాలు సాధించిన నేపథ్యంలో ఓటమి చెందిన అభ్యర్థులను కూడా ఎమ్మెల్యే స్వయంగా కలవడం పార్టీ శ్రేణుల్లో ఉత్సాహాన్ని నింపిందని స్థానిక నాయకులు పేర్కొన్నారు. అభ్యర్థుల కృషిని గుర్తించి వారికి ధైర్యం చెప్పడంపై హర్షం వ్యక్తం చేశారు. ఈ కార్యక్రమంలో స్థానిక కూటమి నాయకులు, కార్యకర్తలు పాల్గొన్నారు.