ప్రేమ పేరుతో వేధింపులు.. యువకుడి అరెస్ట్

మైలవరం: మైనర్ బాలికను ప్రేమ పేరుతో వేధిస్తున్నాడన్న ఆరోపణలపై ఓ యువకుడిని మైలవరం పోలీసులు అరెస్ట్ చేశారు. బాలికను ఏడాది కాలంగా ప్రేమ పేరుతో ద్విచక్ర వాహనంపై వెంబడిస్తూ ఇబ్బందులకు గురిచేస్తున్నాడన్న ఫిర్యాదు మేరకు కేసు నమోదు చేసి అరెస్ట్ చేసినట్లు ఎస్సై సుధాకర్ తెలిపారు.

పోలీసులకు అందిన ఫిర్యాదు వివరాల ప్రకారం.. మైలవరం మండలానికి చెందిన మైనర్ బాలికను యువకుడు కొంతకాలంగా ప్రేమ పేరుతో వెంబడిస్తూ వేధిస్తున్నట్లు ఆరోపణలు ఉన్నాయి. ఈ విషయం గతంలో కుటుంబ సభ్యుల దృష్టికి రావడంతో పెద్దల సమక్షంలో యువకుడిని హెచ్చరించినట్లు సమాచారం.

అయినప్పటికీ అతడి ప్రవర్తనలో మార్పు రాలేదని, వేధింపులు కొనసాగినట్లు బాలిక కుటుంబ సభ్యులు పోలీసులను ఆశ్రయించారు. దీంతో ఫిర్యాదు ఆధారంగా పోలీసులు విచారణ చేపట్టారు.

బాలిక మైనర్ కావడంతో నిందితుడిపై సంబంధిత బీఎన్ఎస్ సెక్షన్లతో పాటు పోక్సో చట్టం కింద కేసు నమోదు చేసినట్లు పోలీసులు తెలిపారు. యువకుడిని అరెస్ట్ చేసి న్యాయస్థానం ముందు హాజరుపరిచి రిమాండ్‌కు తరలించినట్లు ఎస్సై సుధాకర్ వెల్లడించారు. బాలికలు, మహిళల భద్రత విషయంలో రాజీ లేదని పోలీసులు స్పష్టం చేశారు.