పుట్టింటికి వచ్చిన వివాహిత అదృశ్యం!

తిరుపతి, నవంబర్ 13: పుట్టింటికి వచ్చిన 19 ఏళ్ల వివాహిత అనుమానాస్పద పరిస్థితుల్లో అదృశ్యమైన ఘటన తిరుపతి రూరల్ మండలం పైడిపల్లిలో చోటుచేసుకుంది. కుటుంబ సభ్యులు చుట్టుపక్కల ప్రాంతాల్లో ఎంతగా గాలించినా ఆచూకీ లభించకపోవడంతో పోలీసులను ఆశ్రయించారు. పోలీసులు తెలిపిన వివరాల ప్రకారం.. పైడిపల్లికి చెందిన లక్ష్మీదేవి, రామయ్య దంపతులకు ఇద్దరు కుమార్తెలు ఉన్నారు. ఇద్దరికీ తల్లిదండ్రులు వివాహాలు జరిపించారు. చిన్న కుమార్తె కీర్తి (19)కి గతేడాది అక్టోబర్‌లో చిత్తూరుకు చెందిన జ్యోతిష్‌తో కాణిపాకం ఆలయ ప్రాంగణంలో పెద్దల సమక్షంలో వివాహం జరిగింది. వివాహానంతరం కీర్తి అప్పుడప్పుడు పైడిపల్లిలోని తల్లిదండ్రుల ఇంటికి వచ్చి వెళ్తుండేది. ఈ క్రమంలో అక్టోబర్ 30న పుట్టింటికి వచ్చింది. నవంబర్ 4న తండ్రి రామయ్య పొలం పనులకు వెళ్లగా, తల్లి లక్ష్మీదేవి ఆసుపత్రిలో విధులకు వెళ్లారు. అనంతరం పొలం నుంచి ఇంటికి తిరిగి వచ్చిన రామయ్యకు కుమార్తె కనిపించలేదు. దీంతో ఆందోళన చెందిన కుటుంబ సభ్యులు చుట్టుపక్కల ప్రాంతాల్లో గాలించినప్పటికీ ఆమె ఆచూకీ లభించలేదు. కుమార్తె కనిపించకపోవడంతో తల్లి లక్ష్మీదేవి తిరుపతి రూరల్ పోలీస్ స్టేషన్‌లో ఫిర్యాదు చేశారు. ఫిర్యాదు ఆధారంగా పోలీసులు క్రైమ్ నంబర్ 391/2026 కింద కేసు నమోదు చేశారు. కీర్తి అదృశ్యానికి సంబంధించిన పరిస్థితులపై తిరుపతి రూరల్ ఎస్సై శ్రీరామ్ దర్యాప్తు చేపట్టారు. ఆమె ఆచూకీ కోసం విచారణ కొనసాగుతోంది.