సేవలకు సలాం.. వాలంటీర్లకు సత్కారం!

విజయవాడ, అక్టోబర్ 28 : ఉత్సవాల్లో జనసందోహం.. రహదారులపై వాహనాల రద్దీ.. ట్రాఫిక్ క్రమబద్ధీకరణలో పోలీసులకు అండగా నిలిచిన స్వచ్ఛంద సేవకులకు అరుదైన గౌరవం దక్కింది. దసరా మహోత్సవాలు మొదలుకొని విజయవాడ ఉత్సవ్, కార్నివాల్, సరస్ మేళా వరకు నగరంలో నిర్వహించిన భారీ కార్యక్రమాల్లో ట్రాఫిక్ నియంత్రణకు తమవంతు సహకారం అందించిన 35 మంది వాలంటీర్ల సేవలను పోలీసు శాఖ ప్రత్యేకంగా గుర్తించింది. బుధవారం విజయవాడలోని వ్యాస్ కాంప్లెక్స్‌లో ఉన్న ట్రాఫిక్ డీసీపీ కార్యాలయంలో నిర్వహించిన కార్యక్రమంలో ట్రాఫిక్ డీసీపీ షరీన్ బేగం వాలంటీర్లకు ప్రశంసా పత్రాలు అందజేసి అభినందించారు. రద్దీ వేళ పోలీసులకు అండగా.. వేలాది మంది ప్రజలు తరలివచ్చే ఉత్సవాల వాలంటీర్ అభినందనీయుడని కొనియాడారు. సేవలను గుర్తించి గౌరవించడం ద్వారా మరింతమంది యువత సామాజిక సేవా కార్యక్రమాల్లో భాగస్వాములు అవుతారని ఆకాంక్షించారు. యువతలో సేవాభావం పెరగాలి.. ప్రజల భద్రత, సౌకర్యం కోసం పనిచేయడంలో లభించే సంతృప్తి ప్రత్యేకమైనదని డీసీపీ పేర్కొన్నారు. భవిష్యత్తులో జరిగే భారీ కార్యక్రమాల్లోనూ ఇదే స్ఫూర్తితో పోలీసు శాఖకు సహకరించాలని వాలంటీర్లను కోరారు. ప్రజల కోసం స్వచ్ఛందంగా పనిచేసే వారిని పోలీసు శాఖ ఎప్పుడూ ప్రోత్సహిస్తుందని తెలిపారు. ఈ కార్యక్రమంలో ట్రాఫిక్ ఏసీపీలు డి. పవన్ కుమార్, వేద, రోటరీ క్లబ్ ప్రతినిధులు, ఆర్‌ఎస్‌ఐ ఆదినారాయణ తదితరులు పాల్గొన్నారు.