హెల్మెట్ పెట్టడమే కాదు.. క్లిప్ తప్పనిసరి

విజయవాడ, ఆగస్టు 23: ద్విచక్ర వాహనదారులు హెల్మెట్ ధరించడంతోనే బాధ్యత పూర్తయిందని భావించకుండా, హెల్మెట్ చిన్‌స్ట్రాప్ (క్లిప్)ను తప్పనిసరిగా బిగించుకోవాలని ట్రాఫిక్ సీఐ సురేష్ సూచించారు. పాముల కాలువ ప్రాంతంలో ఆదివారం వాహనదారులకు హెల్మెట్ వినియోగంపై అవగాహన కల్పించి, క్లిప్ పెట్టుకోకుండా ప్రయాణిస్తున్న వారిని హెచ్చరించారు.

రోడ్డు ప్రమాదం జరిగిన సమయంలో హెల్మెట్‌కు క్లిప్ సరిగా పెట్టుకోకపోతే అది తల నుంచి జారిపోయే అవకాశం ఉంటుందని, తద్వారా హెల్మెట్ ఉన్నప్పటికీ తలకు తీవ్ర గాయాలయ్యే ప్రమాదం ఉందని వివరించారు. హెల్మెట్ తలకు పెట్టుకోవడం ఎంత ముఖ్యమో.. దాని క్లిప్‌ను గడ్డం కింద సురక్షితంగా బిగించుకోవడం కూడా అంతే ముఖ్యమని స్పష్టం చేశారు. మోటారు వాహనాల చట్టంలోని సెక్షన్ 129 ప్రకారం కూడా రక్షణ హెల్మెట్ తలకు స్ట్రాప్ లేదా ఇతర ఫాస్టెనింగ్ ద్వారా సురక్షితంగా బిగించి ఉండాలి.

ట్రాఫిక్ పోలీసులు జరిమానాలు విధించడమే లక్ష్యంగా కాకుండా వాహనదారుల ప్రాణాలను కాపాడేందుకే నిబంధనల అమలుపై దృష్టి సారిస్తున్నారని సీఐ సురేష్ తెలిపారు. నాణ్యమైన హెల్మెట్‌ను ఉపయోగించడంతో పాటు క్లిప్‌ను సరిగ్గా పెట్టుకోవాలని, వాహనం నడిపేటప్పుడు సెల్‌ఫోన్ వినియోగం, అతివేగం, ట్రిపుల్ రైడింగ్ వంటి ప్రమాదకర అలవాట్లకు దూరంగా ఉండాలని సూచించారు.

“హెల్మెట్ తలపై ఉంటే సరిపోదు.. క్లిప్ బిగిస్తేనే అది ప్రమాద సమయంలో రక్షణగా నిలుస్తుంది” అనే విషయాన్ని ప్రతి వాహనదారుడు గుర్తుంచుకోవాలని ఆయన కోరారు.