ఏలూరులో డీఎస్సీ దీక్షల వద్ద ఉద్రిక్తత.. రాజకీయ రగడ

ఏలూరు జిల్లా మాదేపల్లిలో డీఎస్సీ నియామకాల్లో అక్రమాలు జరిగాయంటూ వైఎస్సార్‌సీపీ ఆధ్వర్యంలో చేపట్టిన రిలే నిరాహార దీక్షలు రెండో రోజుకు చేరాయి. ఈ సందర్భంగా దీక్షా శిబిరం వద్ద ఉద్రిక్తత చోటుచేసుకుందని వైఎస్సార్‌సీపీ ఆరోపించింది. దీక్షలో పాల్గొన్న డీఎస్సీ అభ్యర్థులతో టీడీపీ కార్యకర్తలు దురుసుగా ప్రవర్తించి, శిబిరం నుంచి బలవంతంగా తొలగించేందుకు ప్రయత్నించారని పార్టీ నేతలు పేర్కొన్నారు. విషయం తెలుసుకుని అక్కడికి వెళ్లిన మాజీ ఎమ్మెల్యే అబ్బయ్య చౌదరిని పోలీసులు అడ్డుకున్నారని విమర్శించారు. రిలే నిరాహార దీక్షలను చూసి ప్రభుత్వం భయపడుతోందని, డీఎస్సీ అక్రమాలపై న్యాయమైన పోరాటాన్ని అణచివేయాలని ప్రయత్నిస్తున్నారని వైఎస్సార్‌సీపీ ఆరోపించింది.