సేవా స్ఫూర్తిగా రాజ్‌కుమార్‌ జ్ఞాపకాలు

విజయవాడ, అక్టోబరు 5: రాజ్‌కుమార్‌ జ్ఞాపకాలను సేవా కార్యక్రమాల రూపంలో కొనసాగించడం అభినందనీయమని ప్రభుత్వ విప్‌, విజయవాడ సెంట్రల్‌ ఎమ్మెల్యే బొండా ఉమామహేశ్వరరావు పేర్కొన్నారు. సోమవారం సాయంత్రం 63వ డివిజన్‌ ఉడా కాలనీ ప్రధాన రహదారిలో ఆర్‌కే ఛారిటబుల్‌ ట్రస్ట్‌ ఆధ్వర్యంలో సేవా కార్యక్రమం నిర్వహించారు. ట్రస్ట్‌ చైర్మన్‌ వట్టే వెంకటేశ్వరరావు కుమారుడు వట్టే రాజ్‌కుమార్‌ జ్ఞాపకార్థం ఏర్పాటు చేసిన కార్యక్రమంలో 300 మంది పేద విద్యార్థులకు పుస్తకాలు, పండ్లు, విద్యకు అవసరమైన సామగ్రిని ఎమ్మెల్యే బొండా ఉమా పంపిణీ చేశారు. ఈ సందర్భంగా ఆయన మాట్లాడుతూ చిన్న వయసులోనే మంచి భవిష్యత్తు ఉన్న రాజ్‌కుమార్‌ను కోల్పోవడం బాధాకరమన్నారు. ఆయన తమ మధ్య లేకపోయినా జ్ఞాపకాలను సమాజానికి ఉపయోగపడే కార్యక్రమాలుగా కొనసాగించడం సేవా స్ఫూర్తికి నిదర్శనమని కొనియాడారు. ఏటా రాజ్‌కుమార్‌ వర్ధంతి సందర్భంగా పేదలు, విద్యార్థులకు సాయం చేస్తూ వట్టే వెంకటేశ్వరరావు కుటుంబం మానవతా విలువలను

చాటుతోందన్నారు. 63వ డివిజన్‌లో రాజ్‌కుమార్‌ పేరుతో పార్కును ఏర్పాటు చేయడంతోపాటు చిన్నారులకు అవసరమైన ఆట వస్తువులు, ఇతర సౌకర్యాలను సొంత ఖర్చులతో సమకూర్చడం అభినందనీయమన్నారు. వ్యక్తిగత విషాదాన్ని బాధగా మిగిల్చకుండా సమాజ సేవకు మార్గంగా మార్చడం గొప్ప విషయమని పేర్కొన్నారు. యువత, విద్యార్థులు తమ లక్ష్యాలపై దృష్టి సారించి తల్లిదండ్రుల ఆశయాలను నెరవేర్చాలని బొండా ఉమా సూచించారు. రోడ్డు ప్రమాదాలు, చెడు అలవాట్లకు దూరంగా ఉంటూ విద్య, నైపుణ్యాభివృద్ధి, క్రీడలు, సమాజ సేవ వంటి సానుకూల కార్యక్రమాలపై దృష్టి పెట్టాలని పిలుపునిచ్చారు. రాజ్‌కుమార్‌ పేరిట సేవా కార్యక్రమాలను మరింత విస్తరించాలని కోరుతూ ఆయన కుటుంబ సభ్యులను అభినందించారు. కార్యక్రమంలో సెంట్రల్‌ నియోజకవర్గ సమన్వయకర్త నవనీతం సాంబశివరావు, వట్టే చందు, మాజీ కార్పొరేటర్‌ పైడి తులసి, డివిజన్‌ అధ్యక్షుడు లబ్బా వైకుంఠం, ప్రధాన కార్యదర్శి కోలా శ్రీను, మోత్కూరి క్రాసింగ్‌, పైడి శ్రీను, బత్తుల కొండ తదితరులు పాల్గొన్నారు.