ఈ-మెయిల్‌ హ్యాక్‌.. రూ.78 లక్షలు మాయం!

విజయవాడ, అక్టోబరు 9: సైబర్‌ నేరగాళ్లు మరో భారీ మోసానికి తెగబడ్డారు. ఓ వ్యాపారి ఈ-మెయిల్‌ను హ్యాక్‌ చేసి ఏకంగా రూ.78 లక్షలను ఇతర బ్యాంకు ఖాతాలకు మళ్లించిన ఘటన విజయవాడలో వెలుగుచూసింది. అందిన సమాచారం ప్రకారం గవర్నర్‌పేటకు చెందిన వ్యాపారి రామ్‌దయాల్‌ ఈ-మెయిల్‌ను గుర్తుతెలియని వ్యక్తులు హ్యాక్‌ చేశారు. అనంతరం ఆయన బ్యాంకు ఖాతా వివరాలు మారినట్లుగా నకిలీ ఈ-మెయిళ్లను పంపించారు. వాటిని నిజమని నమ్మడంతో వ్యాపారికి ఓ ఏజెన్సీ నుంచి రావాల్సిన రూ.78 లక్షలు సైబర్‌ నేరగాళ్లు సూచించిన ఇతర ఖాతాలకు బదిలీ అయ్యాయి. ఈ మోసం వెలుగులోకి రావడంతో బాధితుడు పోలీసులను ఆశ్రయించారు. ఘటనపై విజయవాడ సైబర్‌ క్రైమ్‌ పోలీసులు కేసు నమోదు చేశారు. నకిలీ ఈ-మెయిళ్ల ద్వారా భారీ మొత్తంలో నగదు మళ్లించిన వ్యవహారం వ్యాపార వర్గాల్లో ఆందోళన కలిగిస్తోంది. ఈ కేసులో నిందితుల వివరాలు, నగదు బదిలీ అయిన ఖాతాలపై దర్యాప్తులో స్పష్టత రావాల్సి ఉంది.