నీటి ట్యాంకులో బల్లి.. 12 మందికి అస్వస్థత

జగిత్యాల: కలుషిత నీరు తాగి 12 మంది కార్మికులు అస్వస్థతకు గురైన ఘటన జగిత్యాల సమీపంలోని అప్పల నరసాపురంలో చోటుచేసుకుంది. స్థానికంగా ఉన్న భద్రాద్రి ఐరన్‌ ఓర్‌ ఫ్యాక్టరీలోని తాగునీటి ట్యాంకులో బల్లి పడి మృతి చెందినట్లు సమాచారం. ట్యాంకులోని నీటిని తాగిన కార్మికులు వాంతులు, తలనొప్పితో బాధపడటంతో వారిని వెంటనే జగిత్యాల ప్రభుత్వ ఆసుపత్రికి తరలించారు. బాధితులకు వైద్యులు చికిత్స అందిస్తున్నారు. అస్వస్థతకు గురైనవారిలో బీహార్‌కు చెందిన ముగ్గురు కార్మికుల పరిస్థితి విషమంగా ఉన్నట్లు సమాచారం. ఘటనపై సంబంధిత అధికారులు విచారణ చేపట్టాల్సి ఉంది.