‘అర్నాబ్’ తుఫాను సహాయక చర్యలకు రూ.27 కోట్లు!

అమరావతి, అక్టోబర్ 26: ఆంధ్రప్రదేశ్‌ను ‘అర్నాబ్’ తుఫాను ముప్పు పొంచి ఉన్న నేపథ్యంలో రాష్ట్ర ప్రభుత్వం ముందస్తు సహాయక చర్యలను వేగవంతం చేసింది. తుఫాను ప్రభావిత ప్రాంతాల్లో అత్యవసర సహాయక చర్యల కోసం 20 జిల్లాలకు రూ.27 కోట్ల నిధులు విడుదల చేసినట్లు ప్రభుత్వం వెల్లడించింది. బాపట్ల, కృష్ణా, పశ్చిమ గోదావరి, కోనసీమ, తూర్పు గోదావరి, కాకినాడ, అనకాపల్లి జిల్లాలకు రూ.2 కోట్ల చొప్పున మొత్తం రూ.14 కోట్లు కేటాయించింది. శ్రీకాకుళం, మార్కాపురం, గుంటూరు, ఎన్టీఆర్, ఏలూరు, అల్లూరి, పోలవరం, మన్యం, విశాఖపట్నం, విజయనగరం, శ్రీసత్యసాయి, నెల్లూరు, తిరుపతి జిల్లాలకు రూ.కోటి చొప్పున మొత్తం రూ.13 కోట్లు మంజూరు చేసింది. ఈ మేరకు విపత్తుల నిర్వహణ శాఖ ప్రత్యేక ప్రధాన కార్యదర్శి జి. సాయిప్రసాద్ ఉత్తర్వులు జారీ చేసినట్లు వెల్లడించారు. తుఫాను నేపథ్యంలో ప్రజల భద్రత, అత్యవసర సహాయక చర్యలకు ప్రాధాన్యం ఇవ్వాలని ప్రభుత్వం అధికారులను ఆదేశించింది. కాగా, అక్టోబర్ 28 ఉదయానికి తుఫాను ఆంధ్రప్రదేశ్ తీరాన్ని దాటే అవకాశం ఉందని వాతావరణ శాఖ హెచ్చరించింది.