జగన్ రాజకీయ అస్త్రాలు దౌర్జన్యాలు, అక్రమాలే: ఎమ్మెల్యే గద్దె

విజయవాడ, అక్టోబర్ 26: దౌర్జన్యాలు, అక్రమాలు, దాడులే వైఎస్సార్ కాంగ్రెస్ పార్టీ అధినేత వైఎస్ జగన్‌మోహన్‌రెడ్డి రాజకీయ అస్త్రాలని విజయవాడ తూర్పు నియోజకవర్గ ఎమ్మెల్యే గద్దె రామమోహన్ విమర్శించారు. ముఖ్యమంత్రి చంద్రబాబు నాయుడు రాష్ట్రాన్ని అన్ని రంగాల్లో అభివృద్ధి చేసేందుకు కృషి చేస్తుంటే, జగన్ రాజకీయ ప్రయోజనాల కోసం ఉద్రిక్తతలు సృష్టిస్తున్నారని ఆరోపించారు. సోమవారం పటమట అశోక్‌నగర్‌లోని ఎమ్మెల్యే కార్యాలయంలో నిర్వహించిన విలేకరుల సమావేశంలో గద్దె రామమోహన్ మాట్లాడారు. 2021 స్థానిక సంస్థల ఎన్నికల్లో పుంగనూరు, మాచర్ల, పూతలపట్టు, తంబళ్లపల్లి, చంద్రగిరి, శ్రీకాళహస్తి, పులివెందుల, బద్వేల్ తదితర ప్రాంతాల్లో బలవంతపు ఏకగ్రీవాలకు వైసీపీ పాల్పడిందని ఆరోపించారు. ప్రస్తుతం జరుగుతున్న స్థానిక సంస్థల ఎన్నికల్లోనూ పుంగనూరు, రాయచోటి, కడప, పులివెందుల ప్రాంతాల్లో వైసీపీ నాయకులు అక్రమాలకు పాల్పడుతున్నారని విమర్శించారు. ఓటమి భయంతో నామినేషన్ల ప్రక్రియను వివాదాస్పదం చేస్తున్నారని పేర్కొన్నారు. బీసీల రిజర్వేషన్లు, స్థానిక సంస్థల ఎన్నికలను అడ్డుకునేందుకు కోర్టుల్లో 59 కేసులు వేశారని, రూ.12,600 కోట్ల పంచాయతీ నిధులను అడ్డుకునేందుకు ప్రయత్నించారని ఆరోపించారు. రాజకీయ ప్రయోజనాల కోసం మరణాలను సైతం ఉపయోగించుకుంటున్నారని విమర్శించారు. జగన్‌కు రాజకీయ, మానవతా విలువలు లేవంటూ తీవ్ర వ్యాఖ్యలు చేశారు. మరోవైపు, స్థానిక సంస్థల ఎన్నికల్లో కూటమి ప్రభుత్వం తమ అభ్యర్థుల నామినేషన్లను అడ్డుకుంటోందని వైఎస్ జగన్ ఆరోపించారు. ఎన్నికల ప్రక్రియలో జరిగినట్లు చెబుతున్న అక్రమాలపై న్యాయపోరాటం చేస్తామని ప్రకటించారు.