పశ్చిమంలో బీసీలకే పెద్దపీట!

విజయవాడ, అక్టోబర్ 21: విజయవాడ పశ్చిమ నియోజకవర్గంలో తెలుగుదేశం పార్టీ బీసీలకు పెద్దపీట వేసిందని మాజీ ఎమ్మెల్సీ, పశ్చిమ నియోజకవర్గ టీడీపీ ఇన్‌చార్జి బుద్ధా వెంకన్న తెలిపారు. నగరపాలక సంస్థ ఎన్నికల నేపథ్యంలో పశ్చిమ నియోజకవర్గం నుంచి పోటీ చేస్తున్న టీడీపీ కార్పొరేటర్ అభ్యర్థులకు బీఫారాల పంపిణీ కార్యక్రమం నిర్వహించారు. విజయవాడ పార్లమెంట్ సభ్యుడు కేశినేని శివనాథ్ (చిన్ని), బుద్ధా వెంకన్న, నాగుల్ మీరా చేతుల మీదుగా అభ్యర్థులకు బీఫారాలు అందజేశారు. ఈ సందర్భంగా బుద్ధా వెంకన్న మాట్లాడుతూ పశ్చిమ నియోజకవర్గంలో తెలుగుదేశం పార్టీ తరఫున పోటీ చేస్తున్న 17 మంది అభ్యర్థుల్లో 11 మంది బీసీలకు అవకాశం కల్పించడం ఎంతో సంతోషంగా ఉందన్నారు. సామాజిక న్యాయానికి, వెనుకబడిన వర్గాల రాజకీయ ప్రాతినిధ్యానికి తెలుగుదేశం పార్టీ అధిక ప్రాధాన్యం ఇస్తోందని పేర్కొన్నారు. పశ్చిమ నియోజకవర్గంలో పోటీ చేస్తున్న టీడీపీ అభ్యర్థులందరినీ గెలిపించుకోవడమే లక్ష్యంగా ముందుకు సాగుతున్నామని స్పష్టం చేశారు. వందకు వంద శాతం విజయం సాధిస్తామన్న ధీమా వ్యక్తం చేశారు. కూటమి నాయకులు, కార్యకర్తలు సమన్వయంతో పనిచేసి ప్రతి డివిజన్‌లో విజయకేతనం ఎగురవేయాలని పిలుపునిచ్చారు. విజయవాడ మేయర్ అభ్యర్థి వంగవీటి రాధాకృష్ణకు పశ్చిమ నియోజకవర్గం నుంచి అత్యధిక మెజారిటీ లభిస్తుందని బుద్ధా వెంకన్న ఆశాభావం వ్యక్తం చేశారు. నగరపాలక సంస్థ ఎన్నికల్లో కూటమి సత్తా చాటుతుందని ధీమా వ్యక్తం చేశారు.