హామీలు కాదు అమలును చూసి ఓటేయాలి!

విజయవాడ, అక్టోబర్ 21: రాబోయే స్థానిక సంస్థల ఎన్నికల్లో ఓటర్లు రాజకీయ పార్టీలు ఇచ్చే హామీలతో పాటు గతంలో వాటి అమలు తీరును కూడా పరిశీలించాలని మాజీ రాష్ట్ర డైరెక్టర్ వాజిద్ ఖాన్ పిలుపునిచ్చారు. ముఖ్యంగా ముస్లిం మైనారిటీల సంక్షేమం, అభివృద్ధి కోసం రాజకీయ పార్టీలు ప్రకటించిన పథకాలు, ఇచ్చిన హామీలు ఎంతవరకు అమలయ్యాయో తెలుసుకోవాల్సిన అవసరం ఉందన్నారు. ప్రస్తుత కూటమి ప్రభుత్వం ముస్లిం మైనారిటీలకు ఇచ్చిన హామీల అమలు తీరుపై ప్రశ్నించాలని సూచించారు. అదే సమయంలో గత వైఎస్సార్ కాంగ్రెస్ పార్టీ ప్రభుత్వం మైనారిటీలకు ఇచ్చిన హామీలను ఎంతవరకు నెరవేర్చిందో కూడా పరిశీలించాలన్నారు. ఎన్నికల సమయంలో చేసే ప్రకటనలతో పాటు అధికారంలో ఉన్నప్పుడు చేపట్టిన కార్యక్రమాలు, ప్రజలకు అందిన ప్రయోజనాలను పరిగణనలోకి తీసుకోవాలని పేర్కొన్నారు. ఓటు అనేది ప్రతి పౌరుడి హక్కు మాత్రమే కాకుండా భవిష్యత్తును నిర్ణయించే ముఖ్యమైన సాధనమని వాజిద్ ఖాన్ అభిప్రాయపడ్డారు. కులం, మతం, పార్టీ అనే భేదాలకు అతీతంగా ప్రజల సమస్యలను పరిష్కరించే నాయకత్వం, మైనారిటీల హక్కులను గౌరవించే విధానాలపై అవగాహన పెంచుకోవాలని సూచించారు. వాస్తవాలను తెలుసుకుని, స్వతంత్రంగా ఆలోచించి ఓటు హక్కును వినియోగించుకోవాలని పిలుపునిచ్చారు.