బుద్ధా హామీతో చల్లారిన అసమ్మతి సెగలు!

విజయవాడ, అక్టోబర్ 21: విజయవాడ నగరపాలక సంస్థ ఎన్నికల నేపథ్యంలో 52వ డివిజన్‌లో తలెత్తిన అసమ్మతి వ్యవహారానికి టీడీపీ నేత బుద్ధా వెంకన్న జోక్యంతో తెరపడింది. పొత్తు ధర్మంలో భాగంగా చివరి నిమిషంలో 52వ డివిజన్ స్థానాన్ని భారతీయ జనతా పార్టీకి కేటాయించడంతో టీడీపీ తరఫున అవకాశం ఆశించిన గంగాధర్‌రెడ్డి అసంతృప్తికి గురయ్యారు. తనకు అవకాశం చేజారడంపై ఆయన నిరసన వ్యక్తం చేశారు. ఈ విషయం తెలుసుకున్న బుద్ధా వెంకన్న వెంటనే రంగంలోకి దిగి గంగాధర్‌రెడ్డితో మాట్లాడారు. కూటమి పొత్తుల్లో భాగంగానే ఈ నిర్ణయం తీసుకోవాల్సి వచ్చిందని వివరించారు. పార్టీ కోసం కష్టపడిన నాయకులకు అన్యాయం జరగదని, గంగాధర్‌రెడ్డికి పార్టీలో సముచిత స్థానం కల్పించే బాధ్యత తనదేనని బహిరంగంగా హామీ ఇచ్చారు. బుద్ధా వెంకన్న ఇచ్చిన భరోసాతో గంగాధర్‌రెడ్డి అసంతృప్తి సద్దుమణిగింది. దీంతో చివరి నిమిషంలో రాజకీయ వేడి రేపిన 52వ డివిజన్ వ్యవహారం సుఖాంతమైంది. బుద్ధా వెంకన్న జోక్యంతో కూటమిలో సమన్వయం కుదిరినట్లు ఈ పరిణామం చర్చనీయాంశమైంది. అయితే తొలుత నిరసన వ్యక్తమైన నేపథ్యంలో అసమ్మతి సెగలు, నిరసనలంటూ జరుగుతున్న ప్రచారం అవాస్తవమని బుద్ధా వెంకన్న పేర్కొనడం రాజకీయంగా ప్రాధాన్యం సంతరించుకుంది.