భక్తిశ్రద్ధలతో మహబూబ్‌ సుభాని గ్యార్మీ దావత్‌

విజయవాడ, అక్టోబర్‌ 3: విజయవాడ పశ్చిమ నియోజకవర్గంలో హజ్రత్‌ మహబూబ్‌ సుభాని గ్యార్మీ దావత్‌ వేడుకలు గురువారం భక్తిశ్రద్ధలతో, ఆధ్యాత్మిక వాతావరణంలో ఘనంగా జరిగాయి. మహబూబ్‌ సుభాని జెండా చెట్టు దర్గా వెల్ఫేర్‌ అసోసియేషన్‌ కమిటీ అధ్యక్షుడు షేక్‌ హస్సన్‌ బాషా ఆధ్వర్యంలో ఈ కార్యక్రమాన్ని నిర్వహించారు. వేడుకలకు మాజీ మంత్రి, విజయవాడ పశ్చిమ నియోజకవర్గ వైకాపా ఇన్‌ఛార్జి వెలంపల్లి శ్రీనివాసరావు ముఖ్య అతిథిగా హాజరయ్యారు. దర్గాలో ప్రత్యేక ప్రార్థనలు నిర్వహించి ప్రజలందరూ సుఖసంతోషాలు,

ఆయురారోగ్యాలతో జీవించాలని ఆకాంక్షించారు. సమాజంలో శాంతి, సోదరభావం, మతసామరస్యం వెల్లివిరియాలని ప్రార్థించారు. అనంతరం ముస్లిం సోదరులతో కలిసి గ్యార్మీ దావత్‌లో పాల్గొన్న వెలంపల్లి శ్రీనివాసరావు, వారికి స్వయంగా విందును వడ్డించారు. అన్ని మతాల సారాంశం మానవత్వమేనని, ఇటువంటి ఆధ్యాత్మిక కార్యక్రమాలు ప్రజల మధ్య ఐక్యతను మరింత బలోపేతం చేస్తాయని పేర్కొన్నారు. భారీ సంఖ్యలో భక్తులు, ముస్లిం మతపెద్దలు, దర్గా కమిటీ సభ్యులు పాల్గొన్న ఈ వేడుకలు మతసామరస్యానికి ప్రతీకగా నిలిచాయి.