రెబల్స్‌కు చెక్ పెట్టేనా?.. చంద్రబాబు–పవన్ కీలక భేటీ!

అమరావతి, అక్టోబర్ 23: ఆంధ్రప్రదేశ్‌లో స్థానిక సంస్థల ఎన్నికల నేపథ్యంలో కీలక రాజకీయ పరిణామం చోటుచేసుకుంది. ముఖ్యమంత్రి నారా చంద్రబాబు నాయుడుతో ఉప ముఖ్యమంత్రి, జనసేన అధినేత పవన్ కల్యాణ్ గురువారం ఉండవల్లిలోని సీఎం నివాసంలో సమావేశమయ్యారు. ప్రత్యేక కాన్వాయ్ హడావుడి లేకుండా పవన్ కల్యాణ్ సీఎం నివాసానికి వెళ్లడం రాజకీయ వర్గాల్లో చర్చనీయాంశమైంది. మున్సిపల్ ఎన్నికల ప్రక్రియకు సంబంధించి సుప్రీంకోర్టు ఆదేశాలు, ఎన్నికల షెడ్యూల్‌లో మార్పులు, జడ్పీటీసీ, ఎంపీటీసీ నామినేషన్ల వ్యవహారాలపై ఇద్దరు నేతలు చర్చించినట్లు సమాచారం. ముఖ్యంగా కూటమి పార్టీల మధ్య సీట్ల సర్దుబాటు, కొన్ని స్థానాల్లో తిరుగుబాటు అభ్యర్థుల వ్యవహారం, ఎన్నికల ప్రచారంలో సమన్వయంపై దృష్టి సారించినట్లు తెలుస్తోంది. టీడీపీ, జనసేన అభ్యర్థుల మధ్య పోటీ నెలకొన్న స్థానాల్లో అసంతృప్త నేతలను బుజ్జగించడం, అధికారిక అభ్యర్థులకు మద్దతుగా పార్టీ శ్రేణులను ఏకతాటిపైకి తీసుకురావడం వంటి అంశాలు చర్చకు వచ్చినట్లు రాజకీయ వర్గాలు పేర్కొంటున్నాయి. మరోవైపు నామినేషన్ల దాఖలులో అడ్డంకులు ఎదురవుతున్నాయంటూ వైసీపీ చేస్తున్న ఆరోపణలు, ఎన్నికల ప్రక్రియపై న్యాయపరమైన పరిణామాలు కూడా ఈ భేటీకి ప్రాధాన్యం తీసుకొచ్చాయి. అయితే సమావేశంలో తీసుకున్న నిర్ణయాలపై అధికారిక ప్రకటన వెలువడలేదు.