ప్రభాస్‌ జన్మదిన వేడుకల్లో ఎమ్మెల్యే బొండా ఉమా

విజయవాడ, అక్టోబర్‌ 23: తెలుగు సినీ పరిశ్రమ ఖ్యాతిని ప్రపంచవ్యాప్తంగా చాటిచెప్పిన ప్రముఖ నటుడు, పాన్‌ ఇండియా స్టార్‌ ప్రభాస్‌ గొప్ప మానవతావాది అని ప్రభుత్వ విప్‌, విజయవాడ సెంట్రల్‌ ఎమ్మెల్యే బొండా ఉమామహేశ్వరరావు కొనియాడారు. శుక్రవారం ముత్యాలంపాడులోని సిటీ వైడ్‌ ప్రభాస్‌ ఫ్యాన్స్‌ అసోసియేషన్‌ అధ్యక్షుడు దెందుకూరి మురళీకృష్ణంరాజు కార్యాలయం వద్ద ప్రభాస్‌ జన్మదిన వేడుకలను ఘనంగా నిర్వహించారు. అసోసియేషన్‌ గౌరవ అధ్యక్షుడైన బొండా ఉమా కేక్‌ కట్‌ చేసి ప్రభాస్‌కు జన్మదిన శుభాకాంక్షలు తెలిపారు. ఈ సందర్భంగా ఆయన మాట్లాడుతూ ప్రభాస్‌ తన నటన, కృషి, పట్టుదలతో కోట్లాది మంది అభిమానుల హృదయాల్లో ప్రత్యేక స్థానం సంపాదించుకున్నారని అన్నారు. వెండితెరపైనే కాకుండా నిజ జీవితంలోనూ మానవత్వాన్ని చాటుకుంటూ ఆపదలో ఉన్నవారిని ఆదుకోవడంలో ముందుంటారని ప్రశంసించారు. ప్రకృతి వైపరీత్యాల సమయంలో బాధితులకు సహాయం అందించడం ఆయన సేవా దృక్పథానికి నిదర్శనమన్నారు. తెలుగు సినిమా స్థాయిని అంతర్జాతీయంగా పెంచడంలో ప్రభాస్‌ కీలక పాత్ర పోషిస్తున్నారని పేర్కొన్నారు. ఆయన నటిస్తున్న ‘ఫౌజీ’ చిత్రం ఘనవిజయం సాధించి సరికొత్త రికార్డులు సృష్టించాలని ఆకాంక్షించారు. ప్రభాస్‌ ఆయురారోగ్యాలతో మరిన్ని విజయాలు అందుకోవాలని కోరుకున్నారు. ఈ కార్యక్రమంలో సెంట్రల్‌ నియోజకవర్గ కోఆర్డినేటర్‌ నవనీతం సాంబశివరావు, దాట్ల రాజేష్‌వర్మ, సోమన అనిల్‌, మనీష్‌వర్మ, రాఘవేంద్రరాజు, అబ్బులు, బోస్‌, రామకోటయ్య, శ్రీను, రామకృష్ణ, నాగరాజు తదితరులు పాల్గొన్నారు.