భవానీ భక్తులకు బాక్సుల్లో లడ్డూ ప్రసాదం!

విజయవాడ, అక్టోబర్ 21: ఇంద్రకీలాద్రిపై కొలువుదీరిన శ్రీ కనకదుర్గమ్మను దర్శించుకునేందుకు తరలివస్తున్న భవానీ భక్తులకు లడ్డూ ప్రసాదాల పంపిణీలో దేవస్థానం ప్రత్యేక ఏర్పాట్లు చేపట్టింది. భక్తులకు సౌకర్యవంతంగా ఉండేలా ప్రత్యేకంగా రూపొందించిన బాక్సుల్లో లడ్డూ ప్రసాదాలను అందజేస్తున్నారు. ఆలయ కార్యనిర్వహణ అధికారి వీకే శీనా నాయక్ ఆదేశాల మేరకు ప్రసాదాల కౌంటర్ల వద్ద సిబ్బంది భక్తులకు అవసరమైన లడ్డూ ప్రసాదాలను అందిస్తున్నారు. ప్రసాదాల పంపిణీలో ఎలాంటి ఇబ్బందులు తలెత్తకుండా పర్యవేక్షణ చేయాలని సంబంధిత అధికారులు, సిబ్బందికి ఈవో సూచించారు. దసరా ఉత్సవాల అనంతరం భవానీ దీక్షల విరమణ కోసం ఇంద్రకీలాద్రికి విచ్చేస్తున్న భక్తులకు సౌకర్యాలు కల్పించేందుకు దేవస్థానం చర్యలు చేపట్టింది. వివిధ ప్రభుత్వ శాఖలు, స్వచ్ఛంద సేవకుల సమన్వయంతో భక్తులకు సేవలు అందిస్తున్నట్లు ఆలయ వర్గాలు తెలిపాయి. లడ్డూ ప్రసాదాలను ప్రత్యేక బాక్సుల్లో అందజేయడంపై పలువురు భవానీ భక్తులు సంతృప్తి వ్యక్తం చేశారు. ప్రసాదాల పంపిణీలో సౌకర్యాలు కల్పించిన ఆలయ ఈవో శీనా నాయక్‌తో పాటు దేవస్థాన అధికారులకు కృతజ్ఞతలు తెలిపారు.