విజయవాడ ఉత్సవ్‌లో వైభవంగా దేవీ నవరాత్రి పూజలు

విజయవాడ, అక్టోబర్‌ 11: విజయవాడ ఉత్సవ్‌ 2.0లో భాగంగా నగరంలోని సిద్ధార్థ హోటల్‌ మేనేజ్‌మెంట్‌ కళాశాలలో ఆదివారం దేవీ శరన్నవరాత్రి పూజలు వైభవంగా నిర్వహించారు. నవరాత్రి ఉత్సవాల తొలిరోజు విజయవాడ ఎంపీ కేశినేని శివనాథ్‌ (చిన్ని) సతీమణి జానకి లక్ష్మి అమ్మవారిని దర్శించుకుని ప్రత్యేక పూజల్లో పాల్గొన్నారు. వేదమంత్రోచ్ఛారణల మధ్య జరిగిన పూజా కార్యక్రమాల్లో ఆమె భక్తిశ్రద్ధలతో పాల్గొని అమ్మవారి ఆశీస్సులు పొందారు. ఈ సందర్భంగా జానకి లక్ష్మి మాట్లాడుతూ విజయవాడ నగరానికి ఆధ్యాత్మికంగా, సాంస్కృతికంగా ప్రత్యేక గుర్తింపు ఉందన్నారు. దేవీ శరన్నవరాత్రి ఉత్సవాలు ప్రజల్లో భక్తిభావాన్ని పెంపొందించడంతో పాటు ఐక్యతను, సంప్రదాయాలను మరింత బలోపేతం చేస్తాయని పేర్కొన్నారు. విజయవాడ ఉత్సవ్‌ ద్వారా నగర ఆధ్యాత్మిక వైభవాన్ని ప్రజలకు చేరువ చేయడంతో పాటు భావితరాలకు సంస్కృతి, సంప్రదాయాలను పరిచయం చేసే అవకాశం కలుగుతుందన్నారు. ప్రజలందరూ నవరాత్రి ఉత్సవాల్లో భక్తిశ్రద్ధలతో పాల్గొని అమ్మవారి కృపాకటాక్షాలు పొందాలని ఆకాంక్షించారు. కార్యక్రమ నిర్వాహకులు మాట్లాడుతూ ప్రజల భాగస్వామ్యంతో విజయవాడ ఉత్సవ్‌ను మరింత వైభవంగా నిర్వహించేందుకు కృషి చేస్తున్నట్లు తెలిపారు.