విద్యార్థులకు ‘ఫైర్ సేఫ్టీ’ పాఠం

విజయవాడ, ఆగస్టు 27: విద్యార్థుల్లో అగ్ని ప్రమాదాలపై అవగాహన పెంచేందుకు విజయవాడ గ్రామీణ మండలం సీతారామపురంలోని ఓ పాఠశాలలో అగ్నిమాపక శాఖ అధికారులు ఫైర్ సేఫ్టీ అవగాహన కార్యక్రమాన్ని నిర్వహించారు.

వీఎంసీ కమిషనర్ ధ్యానచంద్ర ఆదేశాలతో పాఠశాలలో ఆకస్మిక తనిఖీ నిర్వహించిన అధికారులు, అగ్ని ప్రమాదం సంభవించినప్పుడు భయాందోళనకు గురికాకుండా ఎలా సురక్షితంగా బయటపడాలో విద్యార్థులకు వివరించారు.

ముఖ్యంగా అగ్ని ప్రమాద సమయంలో పొగ వ్యాపిస్తే నిటారుగా పరుగెత్తకుండా నేలకు దగ్గరగా పాకుతూ సురక్షిత మార్గం ద్వారా బయటకు రావాలని సూచించారు. అనంతరం ముందుగా నిర్ణయించిన సేఫ్ అసెంబ్లీ పాయింట్‌కు చేరుకోవాలని తెలిపారు.

అగ్ని ప్రమాదాల నివారణ, అత్యవసర సమయంలో పాటించాల్సిన జాగ్రత్తలు, సురక్షితంగా భవనం నుంచి బయటకు వచ్చే విధానాలపై విద్యార్థులకు అవగాహన కల్పించారు. పాఠశాలల్లో ఇలాంటి ఫైర్ సేఫ్టీ కార్యక్రమాలు విద్యార్థులకు అత్యవసర పరిస్థితులను ఎదుర్కొనేందుకు ఎంతో ఉపయోగపడతాయని అధికారులు పేర్కొన్నారు.