నందిగామలో 45 కుటుంబాలకు పట్టాభిషేకం

నందిగామ, సెప్టెంబరు 26: పేదల సొంతింటి కలను సాకారం చేస్తూ నందిగామ పట్టణంలోని 45 కుటుంబాలకు ఉచితంగా ఇళ్ల పట్టాలు అందించనున్నట్లు ప్రభుత్వ విప్‌, ఎమ్మెల్యే తంగిరాల సౌమ్య తెలిపారు. కాకాని నగర్‌లోని తన కార్యాలయంలో ఆమె ఈ మేరకు ప్రకటన విడుదల చేశారు. జీవో నంబరు 30 ప్రకారం 2019కు ముందు అభ్యంతరం లేని ప్రభుత్వ భూముల్లో ఇళ్లు నిర్మించుకుని, ఇంటి పన్ను రసీదులతో దరఖాస్తు చేసుకున్న వారిలో 45 మందిని అర్హులుగా గుర్తించినట్లు వెల్లడించారు. సెప్టెంబరు 30న ముఖ్యమంత్రి నారా చంద్రబాబు నాయుడు చేతుల మీదుగా పట్టాలు పంపిణీ చేయనున్నట్లు పేర్కొన్నారు. 150 చదరపు గజాల వరకు స్థలాలకు ఉచిత రిజిస్ట్రేషన్‌ చేయనున్నట్లు తెలిపారు. అంతకుమించిన స్థలాలకు ప్రభుత్వ మార్కెట్‌ విలువ ప్రకారం రిజిస్ట్రేషన్‌ ఉంటుందని వివరించారు. మొత్తం 3,746.68 చదరపు గజాల భూమికి సుమారు రూ.3.92 కోట్ల మార్కెట్‌ విలువ ఉంటుందని తెలిపారు. ఇంకా దరఖాస్తు చేసుకోని అర్హులు డిసెంబరు 31, 2026లోగా నిబంధనల మేరకు దరఖాస్తు చేసుకోవాలని ఎమ్మెల్యే తంగిరాల సౌమ్య సూచించారు.