పెడన అభివృద్ధికి రూ.12 కోట్ల హామ్ నిధులు

పెడన, సెప్టెంబర్ 28: పెడన పట్టణంలో సీసీ రోడ్లు, డ్రైనేజీలు, కల్వర్టులు, అంతర్గత రహదారుల నిర్మాణ పనులకు ఎమ్మెల్యే కాగిత కృష్ణప్రసాద్ శ్రీకారం చుట్టారు. పురపాలక సంఘానికి మంజూరైన రూ.12 కోట్ల హైబ్రిడ్ యాన్యూటీ మోడల్ నిధులు, రూ.91 లక్షల 15వ ఆర్థిక సంఘం నిధులతో అభివృద్ధి పనులు చేపట్టనున్నారు. తొలివిడతలో భాగంగా రూ.3 కోట్ల హామ్ పనులు, రూ.12 లక్షల 15వ ఆర్థిక సంఘం పనులకు ఎమ్మెల్యే శంకుస్థాపన చేశారు. పట్టణంలోని 6, 9, 10, 11వ వార్డుల్లో ప్రజలకు అవసరమైన సీసీ రోడ్లు, డ్రైనేజీలు, కల్వర్టులు, అంతర్గత రహదారులను నిర్మించనున్నారు. రాకపోకలను మెరుగుపరచడంతోపాటు ప్రజలకు మెరుగైన మౌలిక వసతులు అందించడమే లక్ష్యంగా ఈ

పనులు చేపట్టారు. ఈ సందర్భంగా ఎమ్మెల్యే కాగిత కృష్ణప్రసాద్ మాట్లాడుతూ రహదారుల సమస్యకు శాశ్వత పరిష్కారం చూపేలా రోడ్లతోపాటు డ్రైనేజీ వ్యవస్థను కూడా అభివృద్ధి చేస్తున్నట్లు తెలిపారు. ప్రభుత్వం అందిస్తున్న నిధులతోపాటు ప్రజల భాగస్వామ్యమూ ముఖ్యమన్నారు. అధికారులు, ప్రజాప్రతినిధులు, ప్రజలు సమన్వయంతో పనిచేస్తే పెడనను మరింత అభివృద్ధి చేయవచ్చని పేర్కొన్నారు. పట్టణంలోని పలు ప్రాంతాల్లో ఒకేసారి అభివృద్ధి పనులు ప్రారంభించడంపై స్థానికులు హర్షం వ్యక్తం చేశారు. కార్యక్రమంలో రాష్ట్ర బీసీ కార్పొరేషన్ మాజీ చైర్మన్ బొడ్డు వేణుగోపాలరావు, కూటమి నాయకులు, కార్యకర్తలు, అధికారులు, వార్డు బాధ్యులు, ప్రజలు పాల్గొన్నారు.