టీడీపీలోకి వైసీపీ నాయకులు, కార్యకర్తల చేరిక

విజయవాడ, అక్టోబర్‌ 16: విజయవాడ సెంట్రల్‌ నియోజకవర్గంలోని 73వ డివిజన్‌ న్యూ రాజరాజేశ్వరిపేటకు చెందిన వైసీపీ నాయకులు, కార్యకర్తలు శుక్రవారం తెలుగుదేశం పార్టీలో చేరారు. సింగ్‌నగర్‌లోని ఎమ్మెల్యే కార్యాలయంలో జరిగిన కార్యక్రమంలో టీడీపీ యువనేత బొండా రవితేజ సమక్షంలో సుమారు 200 మంది పార్టీలో చేరినట్లు నిర్వాహకులు తెలిపారు. ఎమ్మెల్యే బొండా ఉమామహేశ్వరరావు నాయకత్వం, నియోజకవర్గ అభివృద్ధికి చేస్తున్న కృషిపై విశ్వాసంతో టీడీపీలో చేరినట్లు వారు పేర్కొన్నారు. ఈ సందర్భంగా బొండా రవితేజ మాట్లాడుతూ.. ప్రజలకు అందుబాటులో ఉంటూ తాగునీరు, డ్రైనేజీ తదితర సమస్యలను పరిష్కరించేందుకు ఎమ్మెల్యే బొండా ఉమా కృషి చేస్తున్నారని తెలిపారు. ప్రజల అవసరాలను గుర్తించి ప్రణాళికాబద్ధంగా అభివృద్ధి పనులు చేపడుతున్నారని చెప్పారు. ముఖ్యమంత్రి చంద్రబాబు నాయుడు నాయకత్వంలోని కూటమి ప్రభుత్వం ఎన్నికల హామీల అమలుతో పాటు సంక్షేమం, అభివృద్ధికి ప్రాధాన్యం ఇస్తోందన్నారు. తల్లికి వందనం, మహిళలకు ఉచిత బస్సు ప్రయాణం, ఉచిత గ్యాస్‌ సిలిండర్ల వంటి పథకాలతో అర్హులకు ప్రయోజనం కలుగుతోందని పేర్కొన్నారు. రానున్న స్థానిక సంస్థల ఎన్నికల నేపథ్యంలో పార్టీ శ్రేణులు ప్రజల్లోకి వెళ్లి ప్రభుత్వ కార్యక్రమాలను వివరించాలని రవితేజ పిలుపునిచ్చారు. స్థానిక సమస్యలను తెలుసుకుని వాటి పరిష్కారానికి కృషి చేస్తూ పార్టీని క్షేత్రస్థాయిలో బలోపేతం చేయాలని సూచించారు. కులమతాలకు అతీతంగా ప్రజల సంక్షేమం, ప్రాంత అభివృద్ధే లక్ష్యంగా పనిచేయాలన్నారు. పార్టీలో చేరిన వారిలో షేక్‌ చాంద్‌బీ, హసీనా, షేక్‌ మాబు, సాయి, వెంకట్‌, ఎం.శ్రీను, కోలా విజయ, జాన్‌బాషా తదితరులు ఉన్నారు. కార్యక్రమంలో రాష్ట్ర నాగవంశ కార్పొరేషన్‌ చైర్మన్‌ ఎరుబోతు రమణారావు, డివిజన్‌ అధ్యక్షుడు షేక్‌ కబీర్‌, షేక్‌ నాగూర్‌, ఇమ్మానుయేల్‌, అప్పలనాయుడు, తిరుపతి, నాని, వేణు, గుళివిందల లీల, సరోజినీ తదితరులు పాల్గొన్నారు.