‘నేతన్న సేవలో’తో చేనేత కుటుంబాలకు చేయూత

అమరావతి: జాతీయ చేనేత దినోత్సవం సందర్భంగా రాష్ట్ర ప్రభుత్వం చేనేత కార్మికులకు భారీ ఊరట కల్పించింది. ముఖ్యమంత్రి నారా చంద్రబాబు నాయుడు ‘నేతన్న సేవలో’ పథకాన్ని ప్రారంభించి, రాష్ట్రంలోని 71,536 చేనేత కుటుంబాలకు రూ.179 కోట్ల ఆర్థిక సాయం అందిస్తున్నట్లు ప్రకటించారు. ఈ సందర్భంగా సీఎం మాట్లాడుతూ, భారతీయ సంస్కృతి, సంప్రదాయాలకు చేనేత కళ ప్రతీకగా నిలుస్తోందని అన్నారు. చేనేత కార్మికుల జీవనోపాధిని బలోపేతం చేయడంతో పాటు సంప్రదాయ వృత్తిని భావితరాలకు అందించేందుకు ప్రభుత్వం ప్రత్యేక చర్యలు తీసుకుంటోందని తెలిపారు. విద్యుత్ రాయితీలు, 50 ఏళ్లకే పింఛన్, ‘నేతన్న సేవలో’ వంటి సంక్షేమ కార్యక్రమాల ద్వారా నేతన్నల కుటుంబాలకు ఆర్థిక భరోసా కల్పిస్తున్నామని చెప్పారు. చేనేత ఉత్పత్తులను ప్రజలు ప్రోత్సహించడం ద్వారా నేతన్నల జీవితాల్లో వెలుగులు నింపాలని, చేనేత కళను పరిరక్షించేందుకు ప్రతి ఒక్కరూ భాగస్వాములు కావాలని ముఖ్యమంత్రి పిలుపునిచ్చారు.