సీతారామపురంలో భారీ అగ్నిప్రమాదం.. రూ.4 కోట్ల ఆస్తి నష్టం!

విజయవాడ, నవంబర్ 2: విజయవాడ సీతారామపురంలో సోమవారం భారీ అగ్నిప్రమాదం సంభవించింది. రఘువంశీ టింబర్ డిపో అగ్నికి ఆహుతై సుమారు రూ.4 కోట్ల మేర ఆస్తి నష్టం జరిగినట్లు ప్రాథమికంగా అంచనా వేస్తున్నారు. ప్రమాద విషయం తెలుసుకున్న ప్రభుత్వ విప్, విజయవాడ సెంట్రల్ ఎమ్మెల్యే బొండా ఉమామహేశ్వరరావు వెంటనే ఘటనా స్థలానికి చేరుకుని పరిస్థితిని పరిశీలించారు. అగ్నిప్రమాదంలో తీవ్రంగా నష్టపోయిన టింబర్ డిపో యజమానులను, వారి కుటుంబ సభ్యులను ఎమ్మెల్యే పరామర్శించారు. ప్రమాదం జరిగిన తీరుతో పాటు ఆస్తి నష్టానికి సంబంధించిన వివరాలను అడిగి తెలుసుకున్నారు. అనుకోని ప్రమాదంతో భారీ నష్టం వాటిల్లడం బాధాకరమని విచారం వ్యక్తం చేశారు. బాధితులు అధైర్యపడవద్దని, ఈ క్లిష్ట సమయంలో వారికి అండగా ఉంటానని బొండా ఉమామహేశ్వరరావు భరోసా ఇచ్చారు. ప్రభుత్వం ద్వారా అవసరమైన సహాయం అందేలా కృషి చేస్తానని, వ్యక్తిగతంగానూ తనవంతు సహాయ సహకారాలు అందిస్తానని హామీ ఇచ్చారు. బాధిత కుటుంబాలు త్వరగా ఆర్థికంగా కోలుకోవాలని ఆకాంక్షించారు.