తిరుమలలో భక్తుల రద్దీ

తిరుమల, అక్టోబర్‌ 3: వరుస సెలవుల నేపథ్యంలో తిరుమలలో భక్తుల రద్దీ భారీగా పెరిగింది. శ్రీవారి దర్శనం కోసం వివిధ ప్రాంతాల నుంచి భక్తులు పెద్ద సంఖ్యలో తరలివచ్చారు. వైకుంఠం క్యూ కాంప్లెక్స్‌లోని కంపార్ట్‌మెంట్లు భక్తులతో నిండిపోయాయి. టోకెన్లు లేని భక్తులకు స్వామివారి సర్వదర్శనానికి సుమారు 30 గంటల సమయం పడుతున్నట్లు తిరుమల తిరుపతి దేవస్థానం అధికారులు వెల్లడించారు. గురువారం 78,445 మంది భక్తులు శ్రీవారిని దర్శించుకోగా, 40,098 మంది తలనీలాలు సమర్పించి మొక్కులు చెల్లించుకున్నారు. హుండీ కానుకల ద్వారా శ్రీవారికి రూ.4.30 కోట్ల ఆదాయం సమకూరినట్లు అధికారులు తెలిపారు. భక్తుల రద్దీకి అనుగుణంగా క్యూలైన్లలో తాగునీరు, అన్నప్రసాదాల పంపిణీతోపాటు అవసరమైన ఏర్పాట్లు చేపట్టారు. రద్దీ మరింత పెరిగే అవకాశం ఉండటంతో భక్తులు సహనంతో అధికారులకు సహకరించాలని టీటీడీ కోరింది.