విధులకు దూరంగా.. డిమాండ్ల కోసం పోరుబాట

అక్టోబరు 6: సమస్యల పరిష్కారం కోరుతూ వైద్య, ఆరోగ్యశాఖ కాంట్రాక్టు ఉద్యోగులు మంగళవారం నుంచి అత్యవసర సేవలు మినహా మిగిలిన విధులను బహిష్కరించారు. ఏపీ మెడికల్‌ అండ్‌ హెల్త్‌ కాంట్రాక్టు ఎంప్లాయీస్‌ జాయింట్‌ యాక్షన్‌ కమిటీ ఆధ్వర్యంలో కలెక్టరేట్‌ వద్ద నిరసన చేపట్టారు. సీఐటీయూ జిల్లా కమిటీ సంఘీభావం తెలిపింది. జేఏసీ చైర్మన్‌ పులి ప్రవీణ్‌కుమార్‌ మాట్లాడుతూ జిల్లాలో సుమారు ఐదు వందల మంది కాంట్రాక్టు ఉద్యోగులు విధుల బహిష్కరణలో పాల్గొంటున్నారని, దీనివల్ల వైద్య సేవలపై ప్రభావం పడే అవకాశం ఉందన్నారు. దీర్ఘకాలంగా సేవలందిస్తున్న అర్హులైన కాంట్రాక్టు ఉద్యోగులను క్రమబద్ధీకరించాలని, వంద శాతం గ్రాస్‌ వేతనాన్ని పునరుద్ధరించాలని డిమాండ్‌ చేశారు. పారామెడికల్‌ కేడర్లలో రెగ్యులర్‌ నియామకాలు చేపట్టాలని కోరారు. స్టాఫ్‌ నర్సులు, ల్యాబ్‌ టెక్నీషియన్లు, ఫార్మసిస్టులతోపాటు డయాలసిస్‌, రేడియాలజీ, ఈసీజీ విభాగాల సిబ్బంది నిరసనలో పాల్గొన్నట్లు జేఏసీ కన్వీనర్‌ కె. బాలసుబ్రహ్మణ్యం తెలిపారు. అత్యవసర సేవలను కొనసాగిస్తున్నామని స్పష్టం చేశారు. ప్రభుత్వం వెంటనే స్పందించి సమస్యలను పరిష్కరించకపోతే ఆందోళన కొనసాగిస్తామని పేర్కొన్నారు. కార్యక్రమంలో జీసీఎన్‌ఏ ఉపాధ్యక్షురాలు సౌమ్యరేఖ బోకినాల, జిల్లా జేఏసీ సమన్వయకర్త లోకేష్‌కుమార్‌, సీఐటీయూ జిల్లా అధ్యక్షుడు కె. వెంకటేశ్వరరావు, కార్యదర్శి బూర సుబ్రమణ్యం, మండల కన్వీనర్‌ సీహెచ్‌. జయరావు, ఏపీ ఎన్జీఓస్‌ జిల్లా అధ్యక్షుడు ఆకూరి శ్రీనివాస్‌రావు, కాంట్రాక్టు ఉద్యోగులు పాల్గొన్నారు.