పాలమూరు పంటలకు కర్ణాటక జలభరోసా

హైదరాబాద్‌: తెలంగాణ రైతులకు కర్ణాటక ప్రభుత్వం శుభవార్త తెలిపింది. నారాయణపూర్‌ జలాశయం నుంచి జూరాల ప్రాజెక్టుకు నీటిని విడుదల చేసేందుకు కర్ణాటక ఉప ముఖ్యమంత్రి డీకే శివకుమార్‌ సానుకూలత వ్యక్తం చేశారు. తెలంగాణ మంత్రులు జూపల్లి కృష్ణారావు, శ్రీహరి, ఎమ్మెల్యేలు కృష్ణమోహన్‌, మేఘారెడ్డి తదితరులు డీకే శివకుమార్‌ను కలిసి ఉమ్మడి పాలమూరు జిల్లాలో రైతులు ఎదుర్కొంటున్న సాగునీటి ఇబ్బందులను వివరించారు. సుమారు 5.5 లక్షల ఎకరాల్లో వివిధ పంటలు సాగులో ఉన్నాయని, వాటిని కాపాడేందుకు వెంటనే నీటిని విడుదల చేయాలని కోరారు. దీనిపై స్పందించిన డీకే శివకుమార్‌ నీటి విడుదలకు అవసరమైన చర్యలు చేపట్టాలని అధికారులను ఆదేశించారు.