బుడమేరుపై భయం వద్దు

విజయవాడ, సెప్టెంబర్ 24: బుడమేరు పరివాహక ప్రాంతాల ప్రజలు ఎలాంటి భయాందోళనకు గురికావాల్సిన అవసరం లేదని విజయవాడ సెంట్రల్ ఎమ్మెల్యే బొండా ఉమామహేశ్వరరావు స్పష్టం చేశారు. ప్రభుత్వం పూర్తిస్థాయిలో అప్రమత్తంగా ఉందని, పరిస్థితిని ఎప్పటికప్పుడు పర్యవేక్షిస్తూ అవసరమైన ముందస్తు చర్యలు చేపడుతున్నట్లు తెలిపారు. ఇప్పటివరకు సుమారు 10 వేల క్యూసెక్కుల వరద నీటిని కృష్ణానదిలోకి మళ్లించినట్లు వెల్లడించారు. మరింత వరద వచ్చినా సురక్షితంగా మళ్లించేందుకు అధికారులు అన్ని ఏర్పాట్లు చేశారని చెప్పారు. 2024 వరద ముంపు అనుభవాలను దృష్టిలో పెట్టుకొని ముఖ్యమంత్రి చంద్రబాబు నాయుడు నేతృత్వంలోని కూటమి ప్రభుత్వం ముందస్తు ప్రణాళికతో వ్యవహరిస్తోందన్నారు. లోతట్టు ప్రాంతాల్లో నిలిచిన వర్షపు నీటిని మోటార్లతో తొలగిస్తున్నామని తెలిపారు. జిల్లా కలెక్టర్‌తోపాటు సంబంధిత ఇంజినీరింగ్ అధికారులు, ఇతర శాఖల సిబ్బందితో నిరంతరం సమీక్షిస్తూ పరిస్థితిని పర్యవేక్షిస్తున్నామన్నారు. పాయకాపురం, సింగ్‌నగర్, ప్రకాష్‌నగర్, సుందరయ్యనగర్, వడ్ల కాలనీ, రాజీవ్‌నగర్, కండ్రిక ప్రాంతాల ప్రజలు సామాజిక మాధ్యమాల్లో వస్తున్న వదంతులను నమ్మవద్దని కోరారు. అత్యవసర పరిస్థితుల్లో తక్షణ సహాయక చర్యలు చేపట్టేందుకు కాల్ సెంటర్లు ఏర్పాటు చేసినట్లు తెలిపారు. ప్రజలు అధికారిక సమాచారాన్నే విశ్వసించాలని, ఎలాంటి పరిస్థితినైనా ఎదుర్కొనేందుకు ప్రభుత్వం సిద్ధంగా ఉందని బొండా ఉమా స్పష్టం చేశారు.