పుష్పశోభతో వెలిగిపోతున్న ఇంద్రకీలాద్రి!

విజయవాడ, అక్టోబర్ 11: శరన్నవరాత్రి మహోత్సవాల సందర్భంగా విజయవాడ ఇంద్రకీలాద్రి పుష్పశోభతో విరాజిల్లుతోంది. కొండపై కొలువుదీరిన శ్రీ కనకదుర్గమ్మ ఆలయాన్ని వివిధ రకాల రంగురంగుల పుష్పాలతో సర్వాంగసుందరంగా తీర్చిదిద్దారు. పసుపు, నారింజ రంగుల బంతిపూల మాలలు, పచ్చని ఆకులతో రూపొందించిన తోరణాలు భక్తులను ఆకట్టుకుంటున్నాయి. ఆలయ ముఖద్వారం నుంచి అంతర్గత ప్రాంగణం వరకు సంప్రదాయ పుష్పాలంకరణలు ప్రత్యేక ఆకర్షణగా నిలిచాయి. ఎరుపు, తెలుపు, పసుపు, గులాబీ, ఊదా రంగుల పూలతో అలంకరించిన అమ్మవారి సన్నిధి ఆధ్యాత్మిక శోభను సంతరించుకుంది. శరన్నవరాత్రి ఉత్సవాల సందర్భంగా ఎన్టీఆర్ జిల్లా కలెక్టర్ డాక్టర్ జి. లక్ష్మీశ దంపతులు ఆదివారంఇంద్రకీలాద్రిపై శ్రీ కనకదుర్గమ్మను దర్శించుకున్నారు. ఆలయ అర్చకులు ప్రత్యేక పూజలు నిర్వహించి తీర్థప్రసాదాలు అందజేశారు. ఈ సందర్భంగా ఆలయంలో ఏర్పాటు చేసిన పుష్పాలంకరణలు, ఉత్సవ ఏర్పాట్లు ప్రత్యేక ఆకర్షణగా నిలిచాయి. మరోవైపు దసరా ఉత్సవాలకు తరలివచ్చే భక్తులకు ఎలాంటి ఇబ్బందులు తలెత్తకుండా జిల్లా యంత్రాంగం ప్రత్యేక చర్యలు చేపడుతోంది. కలెక్టర్ లక్ష్మీశ పర్యవేక్షణలో దేవస్థానం, పోలీసు, నగరపాలక సంస్థ అధికారులు సమన్వయంతో ఏర్పాట్లు చేస్తున్నారు. దేవస్థానం కార్యనిర్వహణాధికారి శీనా నాయక్ ఆధ్వర్యంలో దర్శన మార్గాల క్రమబద్ధీకరణ, ఆలయ పరిసరాల నిర్వహణ, భక్తుల రాకపోకలపై ప్రత్యేక దృష్టి సారించారు. భక్తుల రాకతో ఇంద్రకీలాద్రిపై పండుగ వాతావరణం నెలకొంది.