రాజరాజేశ్వరి దేవి సన్నిధిలో గవర్నర్ అబ్దుల్ నజీర్

విజయవాడ, అక్టోబర్ 20: విజయదశమి పర్వదినాన్ని పురస్కరించుకుని ఇంద్రకీలాద్రిపై శ్రీ రాజరాజేశ్వరి దేవి అలంకారంలో దర్శనమిచ్చిన కనకదుర్గమ్మను ఆంధ్రప్రదేశ్ రాష్ట్ర గవర్నర్ జస్టిస్ ఎస్. అబ్దుల్ నజీర్ మంగళవారం దర్శించుకున్నారు. శ్రీ దుర్గా మల్లేశ్వర స్వామివార్ల దేవస్థానానికి చేరుకున్న గవర్నర్‌కు ఆలయ అధికారులు, వేద పండితులు ఆలయ మర్యాదలతో ఘన స్వాగతం పలికారు. అనంతరం గవర్నర్ అమ్మవారి అంతరాలయానికి చేరుకుని ప్రత్యేక పూజలు నిర్వహించారు. అమ్మవారి దర్శనం అనంతరం ఆశీర్వచన మండపంలో వేద పండితులు గవర్నర్‌కు వేద మంత్రోచ్ఛారణల మధ్య ఆశీర్వచనాలు అందజేశారు. ఈ సందర్భంగా దేవాదాయ శాఖ కార్యదర్శి కె. కన్నబాబు, కమిషనర్ కె. రామచంద్రమోహన్, ఆలయ చైర్మన్ బొర్రా రాధాకృష్ణ, కార్యనిర్వహణాధికారి వీకే శీనానాయక్ తదితరులు గవర్నర్‌ను సత్కరించి అమ్మవారి శేషవస్త్రాలు, తీర్థప్రసాదాలు, చిత్రపటాన్ని అందజేశారు.