స్థానిక సంస్థల ఎన్నికలకు మరో రెండు నెలలు పట్టే అవకాశం

అమరావతి, సెప్టెంబర్ 29: ఆంధ్రప్రదేశ్‌లో స్థానిక సంస్థల ఎన్నికల నిర్వహణ మరింత ఆలస్యమయ్యే అవకాశం కనిపిస్తోంది. ఎన్నికల ప్రక్రియ ప్రారంభించేందుకు మరో రెండు నెలల సమయం పట్టవచ్చని రాష్ట్ర ఎన్నికల కమిషనర్ అనిల్‌చంద్ర పునేఠా వెల్లడించారు. ఓటర్ల జాబితాల ఖరారు, స్థానిక సంస్థల్లో రిజర్వేషన్ల నిర్ధారణతోపాటు న్యాయస్థానాల్లో కొనసాగుతున్న కేసులపై స్పష్టత రావాల్సి ఉందన్నారు. ఈ కీలక అంశాలు పరిష్కారమైన తర్వాతే ఎన్నికల నిర్వహణపై ముందడుగు వేసే అవకాశం ఉందని పేర్కొన్నారు. ఎన్నికల షెడ్యూల్ విడుదల ఆలస్యమైనప్పటికీ నిర్వహణకు అవసరమైన అంతర్గత ఏర్పాట్లను రాష్ట్ర ఎన్నికల సంఘం ఇప్పటికే ప్రారంభించింది. ఓటర్ల జాబితాల పరిశీలన, పోలింగ్ కేంద్రాల గుర్తింపు, ఎన్నికల సిబ్బంది, సామగ్రి సమీకరణకు సంబంధించిన ప్రాథమిక కసరత్తు కొనసాగుతోంది. న్యాయపరమైన, పరిపాలనాపరమైన అడ్డంకులు తొలగిన వెంటనే ఎన్నికల నిర్వహణపై నిర్ణయం తీసుకొని షెడ్యూల్ ప్రకటించే అవకాశం ఉంది.