దెబ్బతిన్న రహదారులకు తక్షణ మరమ్మతులు

గన్నవరం, సెప్టెంబర్‌ 24: తుఫాను ప్రభావంతో విస్తారంగా వర్షాలు కురుస్తున్న నేపథ్యంలో గన్నవరం నియోజకవర్గంలో ప్రాణ, ఆస్తినష్టం జరగకుండా అధికారులు నిరంతరం అప్రమత్తంగా ఉండాలని ప్రభుత్వ విప్‌, ఎమ్మెల్యే యార్లగడ్డ వెంకట్రావు ఆదేశించారు. గురువారం పంచాయతీ కార్యదర్శులతో దృశ్యమాధ్యమం ద్వారా అత్యవసర సమీక్ష నిర్వహించారు. లోతట్టు ప్రాంతాలు జలమయమయ్యే అవకాశం ఉన్నందున పంచాయతీ కార్యదర్శులు క్షేత్రస్థాయిలోనే అందుబాటులో ఉండాలని సూచించారు. నీరు నిలిచిన ప్రాంతాలు, దెబ్బతిన్న రహదారులు, మురుగునీటి పారుదల సమస్యలపై ప్రత్యేక దృష్టిసారించి ప్రజల సమస్యలను తక్షణమే పరిష్కరించాలని ఆదేశించారు. ప్రజల భద్రతకే తొలి ప్రాధాన్యమిస్తూ అన్ని శాఖల అధికారులు సమన్వయంతో పనిచేయాలని స్పష్టం చేశారు. పంచాయతీ కార్యదర్శుల వాట్సప్‌ బృందం ద్వారా నియోజకవర్గంలోని వర్షాల పరిస్థితిని ఎప్పటికప్పుడు పర్యవేక్షిస్తున్నట్లు యార్లగడ్డ తెలిపారు. అధికారులు అందిస్తున్న సమాచారాన్ని పరిశీలించి అవసరమైన చర్యలు చేపడుతున్నామన్నారు. భారీ వర్షాల్లోనూ విధులు నిర్వహిస్తున్న సిబ్బందిని అభినందించారు. వర్షాల ప్రభావం తగ్గేవరకు ఇదే సేవాస్ఫూర్తితో ప్రజలకు అండగా నిలవాలని పిలుపునిచ్చారు.