కార్మిక లోకానికి పల్లా సూర్యారావు సేవలు చిరస్మరణీయం

విజయవాడ, అక్టోబర్‌ 4: కార్మికోద్యమ బలోపేతానికి, కార్మికుల సంక్షేమానికి జీవితాంతం కృషి చేసిన పల్లా సూర్యారావు ఆదర్శప్రాయుడని సీపీఐ నగర కార్యదర్శి జి.కోటేశ్వరరావు కొనియాడారు. విజయవాడ బుక్‌ బైండింగ్‌ లేబర్‌ వర్కర్స్‌ యూనియన్‌ ఆధ్వర్యంలో వన్‌టౌన్‌లోని లెనిన్‌ భవన్‌లో పల్లా సూర్యారావు సంతాప సభ నిర్వహించారు. యూనియన్‌ కార్యదర్శి బళ్ల నరసింహరాజు అధ్యక్షతన జరిగిన సభలో సూర్యారావు చిత్రపటానికి నాయకులు పూలమాలలు వేసి నివాళులర్పించారు. ఈ సందర్భంగా కోటేశ్వరరావు మాట్లాడుతూ యువజన ఉద్యమాల్లో చురుగ్గా పనిచేసిన సూర్యారావు కమ్యూనిస్టు పార్టీ సిద్ధాంతాలకు ఆకర్షితులై ప్రజా ఉద్యమాల బాట పట్టారని తెలిపారు. సమాజంలో మార్పు కమ్యూనిస్టు ఉద్యమాలతోనే సాధ్యమని, ప్రజా పోరాటాల ద్వారానే సమస్యలకు పరిష్కారం లభిస్తుందని ఆయన బలంగా విశ్వసించేవారని పేర్కొన్నారు. యువజన నాయకుడిగా, భవన నిర్మాణ కార్మికుల నేతగా పనిచేయడంతోపాటు నగరంలోని అనేక కార్మిక సంఘాలకు సూర్యారావు పెద్దదిక్కుగా నిలిచారని

చెప్పారు. కార్మికులకు ఏ సమస్య ఎదురైనా పరిష్కారం కోసం అహర్నిశలు శ్రమించి విజయవాడ కార్మికోద్యమానికి ప్రత్యేక గుర్తింపు తీసుకొచ్చారని కొనియాడారు. సీపీఐ నగర కార్యదర్శిగా విశేష సేవలందించి, అనేక మందిని పార్టీ సిద్ధాంతాల వైపు నడిపించారని తెలిపారు. ఆపదలో ఉన్నవారిని ఆదుకోవడంలో సూర్యారావు ఎప్పుడూ ముందుండేవారని, చివరి శ్వాస వరకు పీడితులు, కార్మిక వర్గాలకు అండగా నిలిచారని పేర్కొన్నారు. నగరాభివృద్ధితోపాటు కొండ ప్రాంతాల్లో నివసించే ప్రజలకు మౌలిక సదుపాయాలు కల్పించడంలోనూ కీలకంగా వ్యవహరించారని చెప్పారు. ఆయన ఆశయాలకు అనుగుణంగా పనిచేయడమే నిజమైన నివాళని కోటేశ్వరరావు పిలుపునిచ్చారు. కార్యక్రమంలో ఏఐటీయూసీ నగర కార్యదర్శి మూలి సాంబశివరావు, సీపీఐ నగర కార్యదర్శివర్గ సభ్యులు తాడి పైడయ్య, కొట్టు రమణరావు, టీడీపీ నాయకుడు, మాజీ కార్పొరేటర్‌ ఉమ్మడి చంటి, బుక్‌ బైండింగ్‌ లేబర్‌ వర్కర్స్‌ యూనియన్‌ నాయకులు ఆర్‌.సురేష్‌, ఎన్‌.వెంకటరావు, ఎ.సాంబశివరావు తదితరులు పాల్గొని నివాళులర్పించారు.